Tramp 500 myńnan astam balaǵa ınvestıtsııalyq shot ashylǵanyn jarııalady
ASTANA. KAZINFORM —Donald Tramp AQSh úkimeti balalarǵa arnalǵan «Tramp shottaryna» alǵashqy 1000 dollardy 500 myńnan astam esepshotqa aýdarǵanyn málimdedi, dep habarlaıdy Reuters.
Baǵdarlama 2025–2028 jyldary dúnıege kelgen AQSh azamattaryna arnalǵan. Onyń maqsaty – balalardyń erte jastan qor naryǵyna qatysýyna jáne jınaq qalyptastyrýyna múmkindik berý.
Tramp Aq úıdegi Sopaq kabınetten New York Stock Exchange men Nasdaq saýdasynyń bastalýyn sımvolıkalyq túrde jarııalady. Saltanatty rásimge eki bırjanyń ókilderi qatysty.
Baǵdarlama aıasyndaǵy qarajat uzaq merzimdi ósimge baǵyttalǵan tómen shyǵyndy ındekstik qorǵa avtomatty túrde ınvestıtsııalanady. Shot ıeleri 18 jasqa tolǵannan keıin qarajatty sheship alýǵa nemese ınvestıtsııalaýdy jalǵastyrýǵa múmkindik alady.
Baǵdarlamany qoldaýshylar bul bastama uzaq merzimdi ınvestıtsııalardy jáne qarjylyq saýattylyqty damytýǵa yqpal etedi dep sanaıdy. Al synshylar tabysy tómen otbasylar qosymsha qarajat sala almaýy múmkin ekenin, sonyń saldarynan baǵdarlamanyń artyqshylyqtaryn tolyq paıdalana almaıtynyn aıtady.
Baǵdarlamany qoldaıtynyn birqatar amerıkalyq kompanııalar, sonyń ishinde Visa, Dell, Comcast jáne Micron Technology málimdedi. Sońǵysy «Tramp shottaryn» qoldaýǵa 250 mıllıon dollar bóletinin habarlady.
Eske salsaq, buǵan deıin Qazaqstandaǵy «Ulttyq qor – balalarǵa» baǵdarlamasy úsh jyl ishinde 6,5 mıllıon balanyń esepshotyna jalpy 2,3 mıllıard dollar aýdarylǵany habarlanǵan bolatyn.
