Tramp $5 mlrd kólemindegi sheteldik kómek pen beıbitshilik shyǵyndaryn qysqartty

ASTANA. KAZINFORM – AQSh prezıdenti Donald Tramp Kongress bólgen shamamen 5 mlrd dollar kólemindegi sheteldik kómek pen beıbitshilikti qoldaý operatsııalaryna arnalǵan qarjyny toqtatýdy kózdep otyr, dep habarlaıdy The New York Post.

Aq úı basshysy bul sheshimdi pocket rescission dep atalatyn sırek qoldanylatyn mehanızm arqyly júzege asyrmaq. Bul – qarjy jylynyń sońyna qaraı (30 qyrkúıekke deıin) Kongreske engiziletin ótinish, ol zań shyǵarýshy organnyń maquldaýyna qaramastan kúshine enedi. Mundaı tájirıbe AQSh-ta sońǵy ret 1977 jyly qoldanylǵan.

Tramp Kongreske qarajatty joıý týraly resmı habarlama joldady. Buǵan deıin bul qarjy sot daýyna baılanysty ýaqytsha toqtatylǵan bolatyn. Atap aıtqanda, 3,2 mlrd dollar AQSh halyqaralyq damý agenttigi (USAID) arqyly bólingen kómekke, 322 mln dollar – demokratııa qoryna, 521 mln dollar – halyqaralyq uıymdarǵa, 393 mln dollar – beıbitshilikti qoldaý is-sharalaryna, taǵy 445 mln dollar – qosymsha beıbitshilik bıýdjetine baǵyttalǵan edi.

Ákimshilik tarapynan «shyǵyndardyń orynsyzdyǵy» dep tanylǵan birneshe tarmaq ta ataldy. Máselen, Gondýrasta klımattyń ózgerýine beıimdelýge bólingen 24,6 mln dollar, Ońtústik Afrıkadaǵy Democracy Works Foundation-ǵa bólingen 2,7 mln dollar jáne Batys Balqanda LGBT qaýymdastyǵyna demokratııany ilgeriletýge arnalǵan 3,9 mln dollar qarjyny qysqartý usynyldy.

Osy sheshimniń zańdylyǵyna qatysty pikirtalastar da týyndap otyr. AQSh-tyń Úkimettik esep berý basqarmasy (GAO) bul tájirıbeni zańsyz dep esepteıdi. Alaıda Aq úıdiń basqarý jáne bıýdjet jónindegi keńsesi «pocket rescission» qoldanylýyn zańdy dep qorǵaýda.

Eske sala ketsek, buǵan deıin AQSh Senaty Tramptyń salyqty azaıtý týraly zań jobasyn maquldady.