Tramp: 2026 jyly Maıamı qalasynda G20 sammıti ótedi

ASTANA. KAZINFORM — 2026 jyly «Úlken jıyrmalyq» (G20) sammıti AQSh-tyń Florıda shtatyndaǵy Maıamı qalasynda ótedi. Bul týraly AQSh prezıdenti Donald Tramp málimdedi, dep jazady TASS.

— AQSh shamamen sońǵy 20 jylda alǵash ret G20 sammıtin óz aýmaǵynda ótkizý mártebesine ıe boldy. Biz bul sammıtti eldegi eń keremet qalalardyń biri — ásem Maıamıda, Florıda shtatynda ótkizetin bolamyz, — dedi Tramp Aq úıde jýrnalıster suraǵyna jaýap bere otyryp.

G20 1999 jylǵy 15–16 jeltoqsanda Berlınde ótken konferentsııada quryldy. Bul bastamaǵa ónerkásibi damyǵan jeti memlekettiń — Ulybrıtanııa, Italııa, Kanada, AQSh, Frantsııa, Germanııa jáne Japonııanyń — qarjy mınıstrleri muryndyq bolǵan. Toptyń basty maqsaty — jahandyq syn-qaterlerge jaýap retinde sheshimder ázirleý protsesine iri damýshy elderdi tartý bolǵan.

G20 músheleri — 19 memleket (negizin qalaýshy eldermen birge Aýstralııa, Argentına, Brazılııa, Úndistan, Indonezııa, Qytaı, Meksıka, Reseı, Saýd Arabııasy, Túrkııa, Ońtústik Afrıka Respýblıkasy jáne Koreıa Respýblıkasy), sondaı-aq Eýropalyq Odaq pen Afrıka Odaǵy.

Osydan buryn Donald Tramp amerıkalyq kásipker ári mıllıarder Ilon Masktyń Respýblıkalyq partııaǵa oralýdan basqa amaly joq ekenin málimdedi.