Tramp 2026 jyldyń aqpanynda Qytaıǵa saparlaıdy

ASTANA. KAZINFORM — AQSh prezıdenti Donald Tramp 2026 jyldyń basynda QHR tóraǵasy Sı Tszınpınmen kezdesý úshin Qytaıǵa resmı saparmen barýy múmkin. Bul aqparatty AQSh qarjy mınıstri Skott Bessent málimdedi, dep jazady Kazinform agenttiginiń menshikti tilshisi.

Jeksenbi kúni NBC News telearnasynyń «Meet the Press» baǵdarlamasynda sóılegen Bessenttiń aıtýynsha, Tramp pen Sı Tszınpın 1 qarashadan bastap engizilýi múmkin AQSh-tyń Qytaı taýarlaryna arnalǵan 100 paıyzdyq jańa baj salyǵyn boldyrmaýǵa múmkindik beretin kelisimge qol qoıýy yqtımal.

Bul oqıǵa álemdik saýda qatynastaryndaǵy betburys sáti bolmaq, óıtkeni álemniń eki iri ekonomıkasy — AQSh pen Qytaı — sońǵy jyldary naryqty turaqsyzdandyryp, dıplomatııalyq qatynastardy shıelenistirgen ózara teketiresti azaıtýǵa múddeli.

Tramp jeksenbi kúni Malaızııaǵa kelip, Ońtústik-Shyǵys Azııa memleketteri qaýymdastyǵynyń (ASEAN) sammıtine qatysty. Bul — onyń Azııaǵa jasalǵan bes kúndik saparynyń alǵashqy aıaldamasy. Sapardyń negizgi bóligi beısenbide Ońtústik Koreıada Sı Tszınpınmen jeke kezdesý bolmaq.

Bessenttiń aıtýynsha, Tramp Pekınge 2026 jyldyń basynda, Qytaıdyń aı kúntizbesi boıynsha jańa jyly (17 aqpan) aldynda barýy múmkin.

Sonymen qatar, Sı Tszınpınniń 2026 jyldyń kúzine josparlanǵan AQSh-qa sapary jáne «Úlken jıyrmalyq» sammıtine qatysýy aldynda ekijaqty kezdesý Vashıngtonda da ótýi múmkin.

Buǵan deıin QHR kommertsııa vıtse-mınıstri Lı Chengan Pekın men Vashıngtonnyń negizgi saýda-ekonomıkalyq máseleler boıynsha ortaq kelisimge kelgenin málimdegen bolatyn.