Tramp 2020 jyly AQSh prezıdenti saılaýyna qaıta túspek
ASTANA. QazAqparat - Donald Tramp Ulybrıtanııaǵa sapary barysynda AQSh Prezıdenti ushaǵynyń bortynda brıtandyq telejýrnalıst Pırs Morganǵa eksklıýzıvti suhbat berdi, dep habarlaıdy QazAqparat The Mirror saıtyna silteme jasap.
Suhbat barysynda Tramp 2020 jyly da AQSh prezıdenti laýazymyna saılaýǵa taǵy da úmitker bolatyndyǵyn ashyq aıtyp, ózine laıyqty qarsylastyń joq ekendigin atap ótken.
Saılaýǵa qatysty saýalǵa jaýap bergen AQSh-tyń is basyndaǵy kóshbasshysy demokrattar arasynda ózine básekeles bola alarlyq kandıdat joq dep jaýap bergen.
«Men olardyń barlyǵyn da bilemin jáne olardyń eshqaısysyn da ózimmen básekeles sanamaımyn», - dep atap ótedi Donald Tramp.
AQSh Prezıdenti ІІ Elızaveta patshaıymmen kezdesýi shyn máninde aıryqsha bolǵanyn jáne onymen Brexit jaıynda sóıleskenin aıtty. Tramptyń sózine qaraǵanda, patshaıym Ulybrıtanııanyń Eýropalyq odaqtan shyǵýy óte kúrdeli protsess dep sanaıdy. «Menińshe, eshkim de Ulybrıtanııanyń EO-dan shyǵýy sonshalyqty qıyn bolaryna kúdik te keltirmegen sııaqty», - dep atap ótedi amerıkalyq prezıdent.
Suhbat barysynda AQSh pen Soltústik Koreıanyń qarym-qatynasyna qatysty máseleler de qozǵaldy. Donald Tramp óz sózinde soltústikkoreılik kóshbasshysy Kım Chen Ynmen ońtaıly baılanysty jolǵa qoıǵanyn málimdedi. Aıtýynsha, ol óziniń basqa da kóptegen áriptesteri sııaqty qatal kelissózshi ári ymyrasyz saıasatker.
Tramp Londonǵa saparynan keıin Helsınkıge barady dep kútilýde. Onda Reseı Prezıdenti Vladımır Pýtınmen kezdesýi josparlanǵan.
Aıta keterligi, naqtylanbaǵan málimetterge qaraǵanda, Tramptyń Ulybrıtanııaǵa saparyna narazylyq tanytqan 250 myń adam London kóshelerine shyqqan.
Donald Tramptyń suhbaty demalys kúni tańerteń ITV telearnasynyń Good Morning Britain baǵdarlamasynda efırge shyǵady.
