Tramp 20 eldiń kóshbasshysymen kezdesýdi josparlap otyr

ASTANA. KAZINFORM —  AQSh Prezıdenti Donald Tramp BUU Bas Assambleıasynyń 80-sessııasy aıasynda 20 eldiń kóshbasshysymen kezdesýdi josparlap otyrǵanyn aıtty, dep habarlaıdy Report.

Amerıkalyq kóshbasshy bul týraly Aq úıde jýrnalısterdiń suraqtaryna jaýap berý kezinde aıtty.

— Men kóptegen basshylarmen kezdesemin, shamamen jıyrmadaı. Barlyǵy kezdeskisi keledi, biz olardyń keıbirimen kezdesemiz, — dedi ol.

Birikken Ulttar Uıymy Bas Assambleıasynyń 80-sessııasynda basty sharalar 23-27 jáne 29 qyrkúıekte ótetin jalpy saıası pikirtalastar dep kútilýde. Osy kezeńde barlyǵy 195 delegatsııa sóz sóıleıdi dep josparlanǵan.

Aıta keteıik, buǵan deıin Tramp jumys vızasynyń tólemin 100 000 dollarǵa deıin kótergenin jazǵan edik.