Tramadoldy retseptisiz satqan almatylyq farmatsevt jazalandy
Zańbuzýshylyqty «Svobodnye lıýdı» qorynyń belsendileri baıqap qalǵan. «Svobodnye lıýdı» qorynyń belsendisi Olga Agapova atalǵan jaıt týraly Facebook jelisinde jazba jarııalady. Jazba negizinde QR DSM Farmatsııa komıtetiniń Almaty qalasy boıynsha departamenti tekserý júrgizgen bolatyn.
Ákimshilik jaýapkershilikke tartý týraly tıisti qaýly 2018 jylǵy 25 qyrkúıekte shyqty.
«Svobodnye lıýdı» qorynyń belsendisi Olga Agapovanyń ótinishinde kórsetilgen faktilerdi tekserdik. Tekserý kezinde Tramadol preparaty dárihana qaldyǵynda joq bolyp shyqty. Buǵan deıin dárihanada satylǵan kólemge belgilengen barlyq kiris qujattary, sondaı-aq qaýipsizdigi men sapasy týraly qorytyndy bolǵan. Alaıda, farmatsevtiń Tramadol preparatynyń bir oramyn retseptisiz satqanyn anyqtaı aldyq. Jibergen qateligin dárihana qyzmetkeri ózi de moıyndady»,- dedi QR DSM Farmatsııa komıtetiniń Almaty qalasy boıynsha departamenti basshysynyń mindetin atqarýshy Murat Muhamedıarov.
Mamannyń aıtýynsha, quramynda psıhotroptyq zattar bar Tramadol preparaty - qaterli isik, jaraqattary bar patsıentterge jáne operatsııadan keıingi kezeńde tek dárigerdiń taǵaıyndaýy boıynsha ǵana beriletin analgetık.
«Osy preparattyń retseptisiz berilýine ákimshilik jaza taǵaıyndalǵan. Aıyppul qaýly zańdy kúshine engen kúnnen bastap 30 kún ishinde keshiktirilmeı tólenýi tıis. Osy merzim ótken soń kemshilikke jol bergen farmatsevt aıyppul tólegeni týraly túbirtekti bizge mindetti túrde kórsetýi tıis, bolmasa qaýly májbúrli túrde oryndalady»- dep túsindirdi Murat Muhamedıarov.
Esterińizge sala keteıik, 17 qyrkúıek kúni Facebook áleýmettik jelisinde Almaty dárihanalarynyń birinde Tramadol preparatynyń retseptisiz satylyp jatqany týraly jazba paıda boldy. Vıdeoǵa «jasyryn satyp alýshynyń» Tramadoldy retseptisiz satyp alyp jatqany, al farmatsevtiń fıskaldyq chekti berýden bas tartqany túsip qalǵan.
Illıýstratsııalyq foto