Traktor mingen qaraǵandylyqtar en dalada adasyp ketken
QARAǴANDY. QazAqparat - Qaraǵandyda qutqarýshylar bir kúnde eki ret traktormen en dalada adasyp ketken jolaýshylardy izdep tapty, dep habarlaıdy «QazAqparat» HAA tilshisi.
Birinshi oqıǵa 26 jeltoqsanda bolǵan. Shet aýdanynyń eki turǵyny jaıylymdaǵy jylqyny baıqap qaıtý úshin traktormen jolǵa shyǵady. Biraq baǵdardan jańylyp, táýlik boıy jol izdep júre bergen. 27 jeltoqsan kúni keshkisin olardyń biri jaıaý jalǵyz ketip, tún ishinde Aqoı aýylyna jetedi. Barǵan boıda tótenshe jaǵdaılar jónindegi departamentke dalada qalǵan dosy jaıly habar beredi.
«Іzdestirý-qutqarý toby adasqan traktorshyny 28 jeltoqsan kúni 17:10-da Aqsý qystaýynan tórt shaqyrym jerden taýyp, aýylǵa jetkizdi», - deıdi TJD baspasóz qyzmetindegiler.
Ekinshi jaǵdaı 27 jeltoqsanda boldy. Atasý aýylynan eki adam K-700 traktorymen «Shynbolat» sharýa qojalyǵyn betke ala jolǵa shyǵyp, adasqan.
«Іzdeý-qutqarý toby olardy polıtsııa jáne sharýa qojalyǵy qyzmetkerleriniń kómegimen qutqardy. Qatty soqqan boran izdeý jumystaryn qıyndatyp jiberdi. Adasqandar 28 jeltoqsan kúni saǵat 12-de Atasýdan 46 shaqyrym jerden tabyldy», - deıdi TJD baspasóz qyzmetindegiler.
TJD qys mezgilinde qaýipsizdik sharalaryna mán berýdi, ásirese borandy kezde alys saparǵa shyqpaýǵa keńes beredi.
