Traktor men kombaındy 6 paıyzben alýǵa bolady: ótinim qabyldaý qaıta bastaldy
ASTANA. KAZINFORM — «QazAgroQarjy» AQ aýyl sharýashylyǵy tehnıkasyn jeńildikpen lızıngke alý boıynsha «Óz jem-shóbimiz», «6% jeńildetilgen lızıng» jáne «Qazaqstanda jasalǵan» baǵdarlamalaryna ótinim qabyldaýdy qaıta bastady, dep habarlaıdy AShM baspasóz qyzmeti.
«Óz jem-shóbimiz» baǵdarlamasy
Baǵdarlama mal sharýashylyǵyn jem-shóp bazasymen qamtamasyz etýge, aýyl sharýashylyǵy janýarlarynyń ónimdiligin arttyrýǵa jáne mal sharýashylyǵy óniminiń kólemin ulǵaıtýǵa baǵyttalǵan. Baǵdarlama boıynsha qazaqstandyq jáne sheteldik óndiristegi aýyl sharýashylyǵy tehnıkasyn, jem-shóp daıyndaý tehnıkasyn jáne jyljymaly sýarý júıelerin satyp alýǵa bolady.
Syıaqy mólsherlemesi jyldyq 6%, lızıng merzimi 10 jylǵa deıin, alǵashqy jarna keminde 15%.
Baǵdarlama bıologııalyq aktıvterdi ósirýmen, kútip-baǵýmen nemese bordaqylaýmen aınalysatyn, jer ýchaskeleriniń qurylymynda jaıylymdary jáne (nemese) shabyndyqtary bar jáne jem óndirýdi nemese daıyndaýdy qujatpen rastaı alatyn aýyl sharýashylyǵy taýar óndirýshilerine arnalǵan. Lızıngalýshy úshin qarsy mindetteme belgilengen: qarjylandyrý alynǵan qarjy jylynan keıingi eki jyl ishinde eńbekaqy qoryn jáne salyqtyq túsimderdi 10%-ǵa arttyrý.
«Jeńildikti lızıng 6%»
Baǵdarlama otandyq óndiristegi jáne qurastyrýdaǵy ózdiginen júretin aýyl sharýashylyǵy tehnıkasyn jeńildikti jaǵdaıda qarjylyq lızıngke berýdi kózdeıdi. Fermerler tehnıkany alǵashqy jarnasyz, 10 jylǵa deıingi merzimge, jyldyq 6% mólsherlememen satyp ala alady.
«Qazaqstanda jasalǵan»
Bul baǵdarlama boıynsha agrarshylar ilmeli, tirkemeli jáne ózdiginen júretin aýyl sharýashylyǵy tehnıkasyn, sondaı-aq aýyl sharýashylyǵy jáne balyq ónimderin, bıologııalyq aktıvterdi tasymaldaýǵa arnalǵan kólik quraldaryn satyp ala alady. Baǵdarlama sharty: tehnıka otandyq óndiriste jasalǵan nemese qurastyrylǵan bolýy tıis. Mólsherleme jyldyq 6%, merzimi 10 jylǵa deıin, alǵashqy jarna lızıng nysany qunynyń keminde 15%-y.
Osyǵan deıin depýtat aýyl sharýashylyǵy tehnıkalarynyń baǵasyn tómendetý máselesin kótergenin jazǵanbyz.
