Traktor basyp ketken aqmolalyqqa aýdan tarıhyndaǵy eń kúrdeli ota jasaldy
ASTANA. KAZINFORM — Mundaı kúrdeli deńgeıdegi operatsııalar ádette oblys ortalyqtarynda nemese respýblıkalyq ınstıtýttar bazasynda ǵana jasalady, dep habarlaıdy Kazinform agenttiginiń tilshisi.
Aqmola oblysy densaýlyq saqtaý basqarmasynyń baspasóz qyzmetiniń málimetinshe, Jaqsy aýdanyndaǵy dárigerler naǵyz erlikke para-par is atqarǵan.
Oqıǵa Jaqsy aýdanynyń Novokıenka aýylynda bolǵan. 65 jastaǵy jumysshy traktordyń astyna túsip qalǵan. «Polıtravma» dıagnozymen aýyr halde jedel járdem arqyly aýdandyq aýrýhanaǵa jetkizildi.
— Dárigerlerdiń aıtýynsha, naýqas túsken sátten bastap ár mınýt mańyzdy bolǵan. Er adamnyń jaǵdaıy ómirine qaýip tóndiretin dep baǵalanǵan. Reanımatsııa bóliminde shuǵyl tekseris júrgizilip, jedel sharalar qolǵa alynǵan. Hırýrgter baýyrdy tigip, jappaı ishki qan ketýdi toqtatty. Ókpeniń jumysyn qalpyna keltirý úshin plevra qýysyna drenaj ornatyldy. Jambas súıekteri syrtqy bekitý apparaty arqyly turaqtandyryldy, — deıdi basqarmadaǵylar.
Dárigerlerdiń jedel áreketiniń arqasynda naýqastyń jaǵdaıy turaqtandyryldy. Alaıda jaraqattyń aýyrlyǵy jambas súıekterin tolyq qaıta qalpyna keltirýdi talap etti.
— Ádette mundaı kúrdeli operatsııalar oblystyq ortalyqtarda nemese respýblıkalyq deńgeıdegi mekemelerde jasalady. Biraq naýqastyń jaǵdaıy shuǵyl kómekti dál sol jerde kórsetýdi qajet etti. Instıtýt mamandarymen telemedıtsına arqyly konsılıým ótkizilip, aýdandyq aýrýhana dárigerleri qashyqtan baqylaýmen ózderi ota jasaý týraly sheshim qabyldady, — dep atap ótti vedomstvo.
Bul — aýdan tarıhyndaǵy alǵashqy osyndaı kúrdeli operatsııa. Bes mamannan quralǵan brıgada shamamen jeti saǵat boıy jambas súıekterin qaıta qurastyryp, osteosıntez jasady, qasaǵa súıegine bloktalatyn plastınalar ornatty jáne segizkóz-myqyn býynyna mınıınvazıvti osteosıntez júrgizdi.
— Qazirgi tańda naýqastyń jaǵdaıy turaqty, ortasha aýyr dep baǵalanyp otyr. Eń bastysy — er adamda qozǵalý belsendiligi qalpyna kelgen, — deıdi oblystyq basqarma.
Mamandardyń aıtýynsha, bul jaǵdaı shalǵaı aýdandarda da joǵary tehnologııaly medıtsınalyq kómektiń qoljetimdi bola bastaǵanynyń dáleli boldy.
Eske salaıyq, buǵan deıin Qazaqstanda kúrdeli neırohırýrgııalyq operatsııalarǵa qoljetimdilik artatyny anyqtaldy.