TRACECA jańa bas hatshysy: Avıatsııalyq logıstıkany damytýǵa basymdyq beremiz
ASTANA. KAZINFORM – TRACECA Úkimetaralyq komıssııasynyń 18-shi otyrysynda uıymnyń jańa Bas hatshysy retinde Ózbekstan kólik mınıstriniń orynbasary Jasýrbek Chorıev tanystyryldy.
Jıynda sóz sóılegen ol TRACECA-nyń halyqaralyq kólik dálizin damytýdaǵy áleýeti joǵary ekenin atap ótti.
– TRACECA aldynda atqarylatyn jumys kóp. Eń bastysy – barlyq múshe memleketterdiń teń dárejedegi qoldaýy qajet. TRACECA-nyń álemdik arenada ózin tanytyp, osy dálizdi damytý boıynsha jetekshi uıymdardyń birine aınalýǵa zor áleýeti bar. Sonymen qatar Іskerlik keńes pen jeke sektor ókilderiniń uıym jumysyna belsendi qatysýy onyń ári qaraı damýy úshin asa mańyzdy, - dedi Jasýrbek Chorıev.
Sondaı-aq jańa Bas hatshy avıatsııalyq logıstıkany damytýǵa erekshe nazar aýdaratynyn aıtty.
– Kóptegen áriptesim avıatsııanyń mańyzdy ról atqaratynyn aıtty. Menińshe, bul baǵyt osy ýaqytqa deıin jetkilikti deńgeıde nazardan tys qalyp keldi. Sondyqtan avıatsııalyq logıstıkany damytýǵa basymdyq beremin. Avıatsııa – logıstıkanyń qozǵaýshy kúshi. Áýe kóligi júıesin jańa dálizdiń logıstıkalyq qurylymyna ıntegratsııalaý onyń damýyna tyń serpin beredi, - dedi ol.
Buǵan deıin Dúnıejúzilik bank Orta dálizge 7,6 mlrd dollar ınvestıtsııa salýdy josparlap otyr.
