TRACECA tsıfrlyq dálizdi damytýǵa basymdyq berip otyr – Aset Asavdaev
ASTANA. KAZINFORM – TRACECA Úkimetaralyq komıssııasynyń 18-otyrysynda uıymnyń Bas hatshysy Aset Asavbaev alty jyldyq qyzmetiniń qorytyndysyn shyǵaryp, uıym aıasynda júzege asqan negizgi bastamalar men jetistikterdi tanystyrdy.
Onyń aıtýynsha, otyrys aıasynda TRACECA-nyń biryńǵaı tranzıttik ruqsat týraly kelisimine qol qoıý josparlanyp otyrǵanyn atap ótti.
– Bul kelisim negizgi kópjaqty kelisimniń irgeli mindetteriniń biri – dáliz baǵyttary boıynsha júkterdiń erkin ári kedergisiz tranzıtine jaǵdaı jasaý jolyndaǵy mańyzdy qadam. Qujat birneshe qaǵaz ruqsattyń ornyna bir elektrondy ruqsatty paıdalanýǵa múmkindik beredi, - dedi Aset Asavbaev.
Bas hatshy TRACECA dálizin tsıfrlandyrý jumystary jalǵasyp jatqanyn atap ótti.
– Elektrondy blankilerge kóshý – TRACECA dálizin tsıfrlandyrý baǵytyndaǵy ortaq saıasattyń mańyzdy bóligi. Bul júıeniń ashyqtyǵy men tıimdiligin arttyrýǵa múmkindik beredi, - dedi ol.
Sonymen qatar 2027–2034 jyldarǵa arnalǵan halyqaralyq kólik dálizin damytý strategııasy men 2027–2030 jyldarǵa arnalǵan is-qımyl jospary ázirlengeni aıtyldy.
– Bul qujattar dálizdi damytýdyń uzaqmerzimdi basymdyqtary men strategııalyq baǵyttaryn aıqyndaıdy, - dedi uıym basshysy.
Aset Asavbaevtyń aıtýynsha, 2022–2026 jyldarǵa arnalǵan jospar aıasynda 107 tarmaq boıynsha jumys júrgizilgen. Bul kólik, logıstıka, mýltımodaldy tasymal jáne ınstıtýtsıonaldyq kedergilerdi joıý baǵyttaryn qamtıdy.
Otyrysta TRACECA júıesine Qyrǵyz Respýblıkasynyń qosylǵany da aıtyldy. Bul uıymnyń geografııalyq aýqymyn Qara teńiz óńirinen tys keńeıtken. Sonymen qatar Ózbekstan 2025 jyldyń naýryzynda Turaqty hatshylyqty birlesip qarjylandyrý týraly kelisimge qosylǵan.
Bas hatshy TRACECA Іskerlik keńesin qurý jáne TRACECA qoryn iske qosý baǵytynda da naqty jumystar atqarylǵanyn jetkizdi. Onyń aıtýynsha, qordyń banktik shoty ashylyp, basqarýshy komıteti qurylyp, quryltaı qujattary daıyndalǵan.
Sóz barysynda uıymdy reformalaý máselesine de toqtaldy. Onyń aıtýynsha, reformalaý tujyrymdamasy TRACECA qyzmetiniń tıimdiligin arttyrýǵa jáne uıymdy jańa geosaıası ári ekonomıkalyq jaǵdaılarǵa beıimdeýge baǵyttalǵan.
Aset Asavbaev alty jyl ishinde 400-den astam kezdesý ótkizilgenin, 6 kelisim jobasy ázirlengenin aıtty. Sondaı-aq avıatsııalyq qaýipsizdik, kıberqaýipsizdik, teńiz ákimshilikteri jáne ushqyshsyz ushý apparattaryn retteý máseleleri boıynsha 100-den astam sarapshy oqytylǵan.
Aıta keteıik, Premer-mınıstr Oljas Bektenov Memleket basshysynyń ulttyq júk áýe kompanııasyn damytý, sondaı-aq teńiz jáne temirjol tasymaldaryn ulǵaıtý boıynsha tapsyrmalaryn oryndaý máseleleri jóninde keńes ótkizdi.
