Tozyǵy jetken júk jáne jolaýshylar kóligin tapsyratyndarǵa aqshalaı ótemaqy beriledi
NUR-SULTAN. QazAqparat - Qazaqstanda júk kólikterin tapsyratyndarǵa aqshalaı ótemaqy beriledi, dep habarlaıdy QazAqparat tilgisi «ÓKM operatory» kompanııasynyń baspasóz qyzmetine silteme jasap.
12 qazannan bastap «ÓKM Operatory» Indýstrııa jáne ınfraqurylymdyq damý, Ekologııa, geologııa jáne tabıǵı resýrstar mınıstrliginiń kelisimimen eski kólikterdi qaıta óńdeýge qabyldaý baǵdarlamasyna ózgeris engizdi. Budan bylaı tozyǵy jetken júk jáne jolaýshylar kóligin tapsyratyndarǵa da aqshalaı ótemaqy beriledi.
«Beriletin aqsha tapsyrylatyn kólikterdiń sanatyna baılanysty aılyq eseptik kórsetkish (AEK) boıynsha baǵalanady. Aıtalyq M2, N1 (salmaǵy 1,3 tonnadan kem kólik quralyn qospaǵanda) jáne N2 sanatyndaǵy kólik quraldaryna 144 AEK (400 032 teńge) beriledi. Osy sanattaǵy tolyq emes jıyntyqtaǵy kólikterge 126 AEK (350 028 teńge) tólenedi. Aýyr salmaqtaǵy júk kólikteri (M3, N3 sanaty) 600 myń teńgeden (216 AEK) 550 myń teńgege (198 AEK) deıin baǵalanady», delingen habarlamada.
Kólik tapsyrǵandarǵa 2 kún ishinde banktegi shotyna aqsha aýdarylady. Aıta ketý kerek kólikti jeńildik sertıfıkatyna almastyrý baǵdarlamasy ýaqytsha toqtatylady.
Esterińizge salaıyq isten shyqqan kólikti qaıta óńdeýge qabyldaý baǵdarlamasy iske qosylǵannan beri Qazaqstan boıynsha 150 myńǵa jýyq kólik joıýǵa tapsyryldy. Onyń ishinde 2 596-sy ortasha tehnıka, 600-ge jýyq aýyr salmaqtaǵy kólik bar. Qabyldanǵan barlyq mashına Qaraǵandydaǵy eski kólikterdi qaıta óńdeıtin zaýytqa jiberiledi.
