«Tózimdiligi 20% artty» — Antıbıotıkke boı bermeıtin bakterııalar kóbeıip keledi
ASTANA. KAZINFORM — Sońǵy jyldary birqatar bakterııanyń antıbıotıkterge tózimdiligi artyp keledi. Keıbiriniń tózimdiligi úsh jylda 20%-ǵa ósken. Bul jóninde resmı saýalymyzǵa bergen jaýabynda QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti málimdedi.
Komıtet dereginshe, antıbıotıkterge tózimdi negizgi qozdyrǵyshtardyń qatarynda E. coli, Klebsiella pneumoniae, Staphylococcus aureus, Pseudomonas aeruginosa, Acinetobacter baumannii jáne Enterococcus spp. bar. Olar kóbine keń spektrli antıbıotıkterge, tsefalosporınderge, ftorhınolondarǵa jáne karbapenemderge tózimdi keledi.
— E. coli jáne Klebsiella pneumoniae bakterııalarynyń III býyn tsefalosporınderine tózimdiligi sońǵy úsh jylda 20%-ǵa artqan, — delingen komıtet jaýabynda.
Qarapaıym tilmen aıtqanda, bakterııa antıbıotıkke tózimdi bolǵan jaǵdaıda dári oǵan burynǵydaı áser etpeýi múmkin.
Mundaı mıkroorganızmder kóbine nesep joldary, tynys alý joldary men qan aǵymy ınfektsııalarynda kezdesedi. Sondaı-aq medıtsınalyq kómek kórsetýge baılanysty ınfektsııalardan da anyqtalady.
Komıtet birneshe antıbıotıkke qatar tózimdi mıkroorganızmderdiń de kezdesetinin atap ótti. Bul másele ásirese reanımatsııa jáne qarqyndy terapııa bólimderinde ózekti.
Aýyr ınfektsııa, sepsıs nemese medıtsınalyq kómekke baılanysty ınfektsııa anyqtalsa, qozdyrǵysh pen oǵan áser etetin antıbıotıkti belgileý úshin bakterıologııalyq zertteý jasalady.
Qazir antıbıotıkterge tózimdilikti baqylaıtyn ulttyq júıege 26 zerthana tartylǵan. Jınalǵan derekter qozdyrǵysh pen ınfektsııanyń túrine qaraı taldanady.
Buǵan deıin jańa týǵan sábılerde de antıbıotıkterge tózimdilik baıqalǵany habarlanǵan edi.
