Tozyǵy jetken kópirlerdi jóndeý: 5 jyldyq jańa baǵdarlama iske qosylady
ASTANA. KAZINFORM – 2027-2031 jyldary elimizdegi respýblıkalyq jáne jergilikti mańyzy bar avtomobıl joldaryndaǵy kópirlerdi túgendeý, jańǵyrtý jáne jóndeý jumystary júıeli túrde júrgizilmek. Ol úshin arnaıy baǵdarlama ázirlenip jatyr. Bul týraly Quryltaı depýtattarynyń saýalyna Premer-mınıstrdiń orynbasary Qanat Bozymbaevtyń jaýabynda aıtylǵan.
Vıtse-premerdiń aıtýynsha, qazirgi ýaqytta kópir qurylystaryn túgendeý, jańǵyrtý jáne jetildirý jónindegi bes jyldyq baǵdarlama ázirlenip jatyr. Qujat múddeli taraptarmen kelisý satysynda. Ony bıylǵy jyldyń sońyna deıin bekitý josparlanǵan.
- Baǵdarlama respýblıkalyq jáne jergilikti mańyzy bar avtomobıl joldaryndaǵy kópir qurylystaryn qamtyp, kópir sharýashylyǵyn basqarýdyń biryńǵaı tásilin qalyptastyrýǵa múmkindik beredi, – dep atap ótti Qanat Bozymbaev.
Onyń málimetinshe, baǵdarlama aıasynda jergilikti jol jelisindegi barlyq kópirdi túgendeý jáne pasporttaý jumystary júrgiziledi. Jınalǵan aqparat Kópirlerdi paıdalaný jaǵdaıyn basqarý júıesine engiziledi. Bul ár nysannyń tehnıkalyq jaı-kúıin baǵalap, jóndeý, konstrýktsııalaryn kúsheıtý nemese rekonstrýktsııalaý qajettigin anyqtaýǵa múmkindik beredi.
Sondaı-aq jumystardyń basymdyǵy kópirdiń apattyq jaǵdaıdaǵy deńgeıine, kólik qozǵalysynyń qarqyndylyǵyna jáne áleýmettik-ekonomıkalyq mańyzyna qaraı belgilenedi.
Qanat Bozymbaevtyń jaýabynda apatty kópirlerdi jóndeýdi qarjylandyrý máselesine de toqtalǵan. Onyń aıtýynsha, 2026 jylǵa deıin jergilikti mańyzy bar apatty kópirlerdi jóndeý respýblıkalyq jáne jergilikti bıýdjetter esebinen qarjylandyrylǵan. Al bıyldan bastap bul shyǵyndar jergilikti bıýdjetter esebinen, onyń ishinde 2026-2028 jyldarǵa arnalǵan jalpy sıpattaǵy transfertterdi eskere otyryp óteledi.
- Qarjylandyrýdyń taǵy bir kózi – Infraqurylymdy damytý qory. Qor qarajaty esebinen jalpy quny 234,7 mlrd teńgeni quraıtyn 43 jobany iske asyrýǵa qoldaý kórsetilgen. Bul jobalardyń bir bóligi apatty jaǵdaıdaǵy kópirler men jergilikti mańyzy bar kópir qurylystaryn jóndeýdi qamtıdy. Jóndeýdi jáne rekonstrýktsııalaýdy qajet etetin kópir qurylystarynyń jıyntyq tizimi jasaqtalady. Onda nysandardyń ornalasqan jeri, tehnıkalyq jaı-kúıi jáne qajetti jumystar kórsetiledi, – dedi Premer-mınıstrdiń orynbasary.
Úkimet basshysy orynbasarynyń atap ótýinshe, osy tizim negizinde 2027-2029 jyldary birinshi kezekte iske asyrylatyn jobalardy qor qarajaty esebinen qarjylandyrý jóninde usynystar ázirlenedi. Budan bólek, 2026-2029 jyldary Aqtóbe – Qyzylorda, Beıneý – Sekseýil, Jańaózen – Temirbaba, Qaraǵandy – Jezqazǵan – Qyzylorda jáne Ortalyq – Batys baǵyttaryndaǵy avtomobıl joldaryn damytý jobalary aıasynda kópirlerdi salý jáne jóndeý jumystary kózdelgen.
- Atalǵan sharalar apatty kópirlerdi kezeń-kezeńimen qalpyna keltirýge, jol qozǵalysynyń qaýipsizdigin arttyrýǵa jáne turaqty kólik qatynasyn qamtamasyz etýge múmkindik beredi, - dedi Qanat Bozymbaev.
Buǵan deıin depýtat Turarbek Tilemisov Premer-mınıstrdiń orynbasary Qanat Bozymbaevqa depýtattyq saýal joldap, tozyǵy jetken kópirler máselesin kótergenin jazǵan edik.