Tozyǵy jetken: Atyraýda psıhıkalyq densaýlyq ortalyǵynyń qurylysy nege kesheýildep tur
ATYRAÝ. KAZINFORM — Atyraýda salynǵanyna 87 jyl bolǵan ǵımaratta jumys istep jatqan Atyraýdaǵy psıhıkalyq densaýlyq ortalyqqa jańa nysan salý máselesi birneshe jyldan beri sheshilmeı keledi.
Zamanaýı talaptarǵa saı keletin jańa ǵımarattyń qajettiligi týraly usynystar 2008 jyldan beri kóterilip keledi. Tozyǵy jetken ǵımarat kúrdeli jóndeýge de kelmeıdi. Jyl saıynǵy aǵymdaǵy jóndeý ǵana jasalyp otyr.
Dıspanserde dárigerlik kabınetter, emshara bólmeleri, ashana jáne kúndizgi statsıonar qyzmeti bar. Sonymen qatar, balalarǵa arnalǵan ońaltý bólimi qarastyrylǵan.
Búginge deıin demeýshilerdiń kómegimen 180 oryndyq ortalyqtyń jobasy jasalyp, jer telimi de bólingen. Alaıda túrli sebepterge baılanysty joba iske aspaı qalǵan. Sonyń ishinde ekologııalyq talaptarǵa sáıkes kelmeýi, atap aıtqanda nysannyń ózen jaǵalaýynan qashyqtyǵy talapqa saı bolmaýy qurylysqa kedergi keltirgen.
4 jyl buryn ortalyqqa jańa ǵımarat salý úshin jer alǵashynda Talqaırań yqsham aýdanynan bólingen edi. Degenmen búgingi jer ýchaskesi Almaly aýylynan berilgen. Sheneýnikter bul jobany iske asyrýǵa múmkindik beretin jobalyq-smetalyq qujattyń sozylyp ketkenin rastaıdy. Atyraý oblystyq densaýlyq saqtaý basqarmasynyń basshysy Qaısar Abdalıevtiń aıtýynsha, jobalyq-smetalyq qujattama birneshe ret túzetilip, qaıta qaralǵan.
— Qurylys basqarmasynyń aqparatyna sáıkes jobalaý jumysy aıaqtaldy. Jazǵa deıin qujatty memlekettik saraptamadan ótkizý josparlanyp otyr. Joba oń qorytyndy alǵannan keıin jergilikti bıýdjetten ǵımaratty salýǵa qarjy suralady. Ózimizdiń josparǵa sáıkes, jyldyń sońyna deıin bul mekemeniń qurylysyn bastaýymyz kerek, — dedi oblystyq densaýlyq saqtaý basqarmasynyń basshysy Qaısar Abdalıev.
Jańa keshende psıhıkalyq jáne narkologııalyq baǵyttaǵy bloktar qarastyrylady. Sonymen qatar, ambýlatorlyq jáne kúndizgi statsıonar qyzmetin keńeıtý kózdelgen. Óńirdiń bas dárigeriniń deregine súıensek, búginde psıhıkalyq dıspanserde 6 myńnan astam patsıent esepte tur. Olardyń qatarynda statsıonarlyq, májbúrli jáne ambýlatorlyq em qabyldaıtyn naýqastar bar.
Buǵan deıin Atyraý qalasyndaǵy saltanat saraıyn rekonstrýktsııalaý jumysy 2 jylǵa jýyq ýaqyttan beri toqtap turǵanyn jazǵan edik.
