Toıshyl qazaqqa asaba men ártisti taýyp beretin «ToiDriver» qosymshasy jasaldy
ASTANA. QazAqparat - Qazaqstanda úıden shyqpaı-aq óziń qalaǵan baǵaǵa tamada men ártis tabýǵa múmkindik beretin ToiDriver baǵdarlamasy paıda boldy.
«Bul jobany Dýman esimdi seriktesimmen birge jasap shyǵardyq. Jalpy, meniń oıymsha, toı ıesi aqsha tóleı otyryp, nege ártister men uıymdastyrýshylardy ózi izdeýi kerek? Kerisinshe, ártister men tamadalar ony izdeýi kerek. ıAǵnı, toı ıesi qolda bar aqshasyn kórsetse jetkilikti emes pe!? Mine, biz oılap tapqan mobıldik qosymsha osyǵan múmkindik beredi. Bul mobıldi qosymshany toı ıesi uıaly telefonyna kóshirip alyp, tirkeledi. Qosymshanyń eki fýnktsııasy bar: birinshiden, tirkelip, qaı qalada ekenin, qandaı mereke ekenin jazyp, óz baǵasyn qoıady. Onyń jazbasy push arqyly ToiDriver-da tirkelip, óziniń qyzmetterin usynǵan ártister men tamadalarǵa taraıdy. Osylaısha, ártis ne uıymdastyrýshy tapsyrys berýshige ózi habarlasady. Ekinshi fýnktsııasy - toı ıesi baǵdarlamaǵa kirip, qajetti parametrlerdi jazsa, jetkilikti. Eshqandaı deldalsyz sol kúni kestesi bos ártis ne tamadanyń baılanys telefondary, anketasy shyǵady. Tapsyrys berýshi arasynan bireýin tańdap merekesin ótkize beredi», - deıdi joba avtorynyń biri Jandos.
Bul baǵdarlamanyń saıty da bir-eki aptada jumysyn bastaıdy eken. Osylaısha, ToiDriver - kez kelgen merekelik sharany deldalsyz uıymdastyrýǵa kómektesetin TMD elderiniń arasyndaǵy eń alǵashqy mobıldi qosymsha bolmaq.
Jandostyń aıtýynsha, joba «Bolashaq» baǵdarlamasymen oqyǵan túlekterdiń jemisi jáne bul uzaq merzimdi bıznes-joba. Baǵdarlamany IOS jáne Android operatsııalyq júıelerinen tegin kóshirip alýǵa bolady.
«Baǵdarlamanyń qyzmetin paıdalanatyn tapsyrys berýshiler, ıaǵnı, kez kelgen toı ıesi jazbasy úshin nemese ártistiń telefonyn alý úshin múldem aqsha tólemeıdi. ıAǵnı, halyq úshin bári tegin. Al, baǵdarlamaǵa qyzmetterin ornalastyratyn ártister úshin bir jyldan soń aqy engizýimiz múmkin, onyń ózinde 400-500 teńge kóleminde. Bolashaqta jalǵan tapsyrys berýshiler kóbeıip ketse, bálkim 20-30 teńge kóleminde mindetti jarna engizýimiz múmkin», - deıdi Jandos Tursymbaev.
Osylaısha, endi toıshyl qazaq kez kelgen toıyna sán beretin asaba, ánshi, ártisti, bıshi, foto-vıdeo operatordy, sıqyrshylar men ózge de qyzmet ıelerin úıinen shyqpaı-aq ózi qalaǵan baǵaǵa taba alady.
