Toıotanyń Reseıdegi bólimshesi osy jerde ekinshi zaýyt salýdy usyndy
ASTANA. Qyrkúıektiń 22-si. QazAqparat - Toıotanyń Reseıdegi bólimshesi ózderiniń bas kompanııasyna Reseıden ekinshi zaýyt salýdy usynady. Bul jóninde «Toıota Motors» JShS basshysy Takeshı Isogaıa Reseıde avtomobılder men avtobólshekter shyǵarýdy damytý jónindegi májiliste aıtty,
dep habarlaıdy RBK.
«Biz jaqyn arada óz kórsetkishterimizdi qaıta qaraımyz jáne Reseıde ekinshi zaýyt salý jáne ony damytýdy kúsheıtý jóninde Toyota Motors Corp. jedel talqylaý júrgizýdi josparlap otyrmyz», - dedi ol. T.Isogaıanyń aıtýynsha, D jáne E býynyndaǵy avtomobıl óndirisine kúsh salý qajet, óıtkeni shyǵarý kólemi kóp bolmaǵanymen, olardyń qosymsha quny óte joǵary.
2007 jylǵy jeltoqsannyń 21-inen bastap Peterbýrg mańyndaǵy Shýsharada Toıota kóligi shyǵaryla bastady. Zaýyttyń óndiristik qýaty týraly aıtar bolsaq, munda jylyna 20 myń Toıota Kamrı kóligi shyǵarylady. Qazirgi ýaqytta kompanııada 750 adam jumys isteıdi.
