«Toyota» jáne «Lexus» saýda belgilerin paıdalanýǵa shekteý qoıý Qazaqstandy qylmystylar otanyna aınaldyrady - QR «Táýelsiz AvtoBıznes odaǵy»
ALMATY. QazAqparat - «Toyota» jáne «Lexus» saýda belgilerin paıdalanýǵa shekteý qoıǵan «BMF grýpp» JShS monopolıstik áreketi Qazaqstandy qylmystylar otanyna aınaldyrady. Osyndaı pikirdi QR «Táýelsiz AvtoBıznes odaǵy» QB basqarma tóraǵasy Pavel Kım aıtty.
Esterińizge sala keteıik, 2012 jyldyń qyrkúıek aıynda «Toyota Motor Corporation» kompanııasy senimdi ókili - «BMF grýpp» JShS arqyly «Toıota» men «Leksýstyń» qosalqy bólshekterin ákelýge, satýǵa, saqtaýǵa, jarnamalaýǵa shekteý engizgen bolatyn. Ol boıynsha atalǵan markaly kólikterdiń qosalqy bólshekterin tek resmı dıllerlerden satyp alýǵa ruqsat etilgen. Túpnusqa qosalqy bólshekterdi ımporttaýmen aınalysatyn kásipkerler bul sharany qosalqy bólshekter naryǵyn monopolızatsııalaý dep baǵalaýda. Qazirgi tańda Qazaqstanda «BMF grýpp» JShS bastamasymen azamattardy QR Ákimshilik zań buzýshylyqtar týraly Kodeksiniń 1-bólimi 145-baby boıynsha ákimshilik jaýapkershilikke, saýda belgilerin zańsyz paıdalandy degen jeleýmen QR Qylmystyq Kodeksiniń 1-bólimi 199-baby boıynsha qylmystyq jaýapqa tartý sharasy bastaldy. Osyǵan baılanysty avtokólikterdiń qosalqy bólshekterin satatyndar ǵana emes, «BMF grýpp» JShS ruqsatynsyz «Toıota» (2300 mashına) jáne «Leksýs» (5600) kólikterin satý týraly jarnama bergen azamattar da Ákimshilik Kodekstiń 1-bólimi 145-baby boıynsha ákimshilik jaýapqa tartylýy múmkin. Al zańbuzýshylyq qaıtalanǵan jaǵdaıda olar QR QK 1-bólimi 199-baby boıynsha qylmystyq jaýapqa tartylady. «Eger bul aqylǵa syımaıtyn tyıym osylaı jalǵasa berse, Qazaqstan jaqyn arada qylmystylar otanyna aınalary ǵajap emes. Aıta keterligi, bul tuzaqqa shaǵyn jáne orta bıznes ókilderi, usaq ımporterler, jeke kásipkerler túsýde. Bir monopolıstiń múddesi úshin nelikten myńdaǵan qazaqstandyq kásipker japa shegýi kerek? Qazirdiń ózinde 2 kásipker - qylmystyq jaýapkershilikke, 53 kásipker ákimshilik jaýapkershilikke tartyldy», - dedi Pavel Kım. Qosalqy bólshekter ımporterleri muny QR qoldanystaǵy zańdaryn óreskel buzý dep esepteýde. «Qalyptasqan ahýal shaǵyn jáne orta bıznesti orny tolmas shyǵynǵa uryndyryp otyr. Monopolısterdiń rynokty basyp alýyna, taýarlar men qyzmet túrleriniń baǵasyn jan-jaqty qymbattatýǵa jaǵdaı jasalýda. Qazaqstan ekonomıkasyna orasan zor shyǵyn keltirilip, memlekettik bılik qurylymdarynyń bedeline nuqsan kelip otyr. Eger quzyrly organdar tıisti shara qoldanbaıtyn bolsa, Odaq halyq birligi men memlekettik bıliktiń, Konstıtýtsııanyń jáne azamattardyń quqyqtary men bostandyǵynyń kepili - Memleket basshysynyń kómegine júginbek», - dep qorytyndylady Pavel Kım.
