«Toıota Sıtı Almaty» avtosalonyn 300 mln teńgege «sazǵa» otyrǵyzǵan kúdikti ustaldy
ASTANA. QazAqparat - Almaty qalasyndaǵy «Toıota Sıtı Almaty» avtosalonynyń 300 mln teńgege jýyq qarajatyn urlaǵan kúdikti ustaldy. Bul týraly búgin brıfıngte QR Іshki ister mınıstrliginiń resmı ókili Almas Sadýbaev aıtty, dep habarlaıdy QazAqparat tilshisi.
«Almaty qalalyq krımınaldyq polıtsııa qyzmetkerleri Túrkistan oblysyna qarasty Saryaǵash qalasynda «Toıota Sıtı Almaty» avtosalonynyń burynǵy qyzmetkerin asa iri kólemde alaıaqtyq jasaǵany úshin ustady. Ustalǵan kúdikti jańa avtokólikterdi satý jeleýimen azamattardan 150 mln teńgeden astam aqsha alǵan. Sonymen qatar ol klıentterdiń jańa kólik satyp alý úshin tólegen shamamen 140 mln teńge somasyndaǵy qarjylaryn ıelenip ketken», - dedi Almas Sadýbaev.
Sonymen qatar resmı ókildiń aıtýynsha, Aqtóbe oblystyq ІІD krımınaldyq polıtsııa qyzmetkerleri óńirdiń jergilikti 2 turǵynyn ustaǵan. Olar Qandyaǵash qalasynan 160 shaqyrym jerdegi ken ornynda turǵan konteınerlerden quny 200 mln teńgeden asatyn burǵylaý qondyrǵylaryn urlaǵan.
