Toyota men Waymo 2027 jyly Japonııada júrgizýshisiz taksı qyzmetin iske qospaq
ASTANA. KAZINFORM — Toyota Motor men amerıkalyq Waymo kompanııasy 2027 jyly Japonııada júrgizýshisiz taksılerdi synaqtan ótkizýdi josparlap otyr. Joba aıasynda Toyota bZ4X elektromobılderi paıdalanylady. Synaq aıaqtalǵannan keıin seriktester qyzmetti kommertsııalyq negizde iske qosýdy kózdeıdi, dep jazady Kyodo.
Kompanııalar yntymaqtastyq jónindegi josparyn 30 qazanda jarııalady. Olardyń málimetinshe, kólikter Waymo ázirlegen avtonomdy basqarý tehnologııalarymen jabdyqtalady. Aıtı prefektýrasynyń Toıota qalasyndaǵy Toyota zaýyty avtomobılderdi qurastyrýdan bastap, júrgizýshisiz basqarý júıesin ornatýǵa deıingi barlyq óndiristik jumysty atqarady.
Alǵashqy kezeńde seriktester tolyq avtonomdy taksı qyzmetiniń jumysyn synamaq. Ázirge kompanııalar synaq qaı óńirlerde ótetinin jáne oǵan qansha kólik qatysatynyn jarııalaǵan joq.
Waymo buǵan deıin qyzmet kórsetip kelgen elderdegi jumys aýqymyn da birtindep keńeıtýdi josparlap otyr. Olardyń qatarynda Ulybrıtanııa bar.
Toyota men Waymo arasyndaǵy yntymaqtastyq 2025 jylǵy sáýirde bastalǵan. Kompanııalar avtonomdy kólik basqarý tehnologııalaryn damytýdy jedeldetip, olardy kólik salasynda keńinen qoldanýdy kózdeıdi. Atap aıtqanda, seriktestik taksı qyzmetimen shektelmeı, kommertsııalyq júk jáne jolaýshy tasymaly baǵyttaryn da qamtýy múmkin.
Bul týraly Toyota kompanııasynyń atqarýshy vıtse-prezıdenti Hırokı Nakadzıma málimdedi. Onyń aıtýynsha, seriktestik kólik naryǵynyń basqa da segmentterinde jumys isteýge múmkindik ashady.
Sondaı-aq kompanııalar avtonomdy basqarýdyń tórtinshi deńgeıine jatatyn avtomobılderdi damytýǵa múddeli. Mundaı kólikter belgili bir jaǵdaılarda jáne arnaıy belgilengen jol ýchaskelerinde júrgizýshisiz qozǵala alady.
Buǵan deıin Toyota Motor Corp. kompanııasy Joby Aviation Inc. startapymen Joby ázirlegen elektrli ushaqtardy shyǵarý úshin birlesken kásiporyn qurý týraly kelisimge qol qoıǵanyn jarııalaǵan bolatyn.
