«Toyota» kompanııasy 2 mıllıonǵa jýyq «Prius» markaly avtokóligin qaıtaryp jatyr
ASTANA. QazAqparat - «Toyota» kompanııasy baǵdarlamalyq qamtamasyz etýdegi qatelik saldarynan álem boıynsha 1,9 mln. «Prius» markaly avtokólikterin qaıtaryp shaqyrtýda.
Atap aıtqanda, «Prius» kólikteriniń 997 myńy Japonııadan, 713 myńy Soltústik Amerıkadan, 130 myńy Eýropadan, al qalǵandary Azııa, Taıaý Shyǵys jáne ózge óńirlerden keri qaıtarylady.
Belgili bolǵandaı, 2009 jyldyń naýryzy men 2014 jyldyń aqpany aralyǵynda shyǵarylǵan kólikter tekserýden ótpek.
Kompanııa ókilderi osy kúnge deıin baǵdarlamalyq qamtamasyz etý saldarynan apattar bolmaǵanyn atap ótýde.
2009 jyldan beri túrli problemalar sebebimen «Toyota» kompanııasy jalpy 14 mıllıonnan astam avtokólikti qaıtaryp aldy.
