Toyota Camry júrgizýshisi jol apaty kezinde telefonmen sóılesken - Parafıevanyń qorǵaýshysy
ALMATY. QazAqparat - Almatyda eki aıaǵynan aırylǵan Ekaterına Parafıevanyń isi boıynsha sot protsesi bastaldy. Sot aldynda avtobýs júrgizýshisi Jańabaev Dəýren jaýap berýde, dep habarlaıdy QazAqparat tilshisi sot zalynan.
Avtobýs júrgizýshisine QR QK 345-babynyń 2-bólimi boıynsha adam densaýlyǵyna úlken zalal keltirgen jol apatyna əkelgen jol erejesin buzdy degen aıyp taǵyldy.
Prokýrordyń aıtýynsha, Dáýren Jańabaev ál-Farabı kóshesimen batysqa kele jatyp, aldynda kele jatqan Toıota Kamrımen soqtyǵysqan. Soqqydan Toıota Kamrı sol jaqtaǵy «Honda CR-V» kóligin qaǵady.
Nátıjesinde eki kóliktiń arasynda Honda júrgizýshisi Ekaterına Parafıeva men onyń qurbysy qysylyp qalǵan.
Avtobýs júrgizýshisi bolsa óz kinásin moıyndamady.
Onyń qorǵaýshysy bul iste Parafıevanyń is-áreketin de qosa qaraýdy aıtyp, isti qaıta tergeýge jiberýge ótinish berdi.
Sot otyrysynda suralǵan Toıota Kamrı júrgizýshisi Ulan Abdýalıev jol apaty qalaı bolǵanyn aıtyp berdi.
Parafıevanyń advokaty Janna Orazbahova Ksell kompanııasynan qońyraýlar detalızatsııasyn jarııa etti. Qujatqa sáıkes Abdýalıev jol apaty bolǵan ýaqytta Ánýar degen adammen sóılesip otyrǵany anyqtaldy. Áńgime 136 sekýndqa sozylǵan.
Alaıda, Abdýalıev Ulan óziniń telefonmen sóılesken-sóılespegeni esinde joq ekenin aıtty.
«Men sol jaq shette kele jatyp, ashyq turǵan lıýkti kórdim. Odan óte bere jyldamdyqty azaıtyp, oń jaqqa aýysa bastadym. Sol kezde oń jaq tustan art jaǵymnan soqqy boldy. sol kezde kólik aınalyp ketip, Hondany soqtym. Qalaı ekenin bilmeımin, ıyǵym qatty soqqy alǵasyn men esimnen tanyp qaldym. Esimdi jısam, jerde jatqan qyzdardy kórip shoshyp kettim, mende shok boldy. Telefonmen sóıleskenim esimde joq. Biraq men únemi telefonmen blıýtýz arqyly sóılesemin», - dedi ol.
Jańabaevtyń qorǵaýshysy Seıdalıev Baqytjan tergeý barysynda Ekaterına Parafıevanyń is-əreketi durys tergelmegenin, sol úshin qaıta jiberýdi ótindi. Aıyptalýshy Jańabaev óz kinəsin moıyndamady.
Sot barysynda Ekaterına Parafıeva oqıǵanyń qalaı bolǵanyn aıtyp berdi.
«16 maýsymda tús kezinde qurbymmen Əl-Farabı kóshesinde batysqa qaraı kele jattyq. Aýa raıy ashyq, jolda kólik bolmady. Prezıdent parkine jete bere ashyq lıýkti kórdim. Jyldamdyqty azaıtyp aınalyp ótpek boldym. Sol kezde kóligim shaıqalyp ketti. Dóńgelek jarylǵanyn baıqadym. Syrtqa shyǵyp júksalǵyshtan belgi almaqshy bolǵanda ózime ushyp kele jatqan Kamrıdi baıqadym. Sodan qulap qaldym»,- dedi E. Parafıeva.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry kóliginiń artqy bóligi ushyp kelip Honda CRV kóligine tıgen. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn. Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Endi ol arnaıy jattyǵýlardyń arqasynda protez kııýge daıyndalmaq. Kelinshek qaıyrymdylyq sharalaryna, qoǵamdyq jumystarǵa belsendi aralasýdy bastady. Ol múmkindigi shekteýli jandarǵa barynsha úmit syılap, kúresýge keńes berip keledi. Ekaterına qazir jattyǵý zalyna baryp júr.
