Toyota Alphard pen Estima kólikterimen jolaýshy tasymalyna tyıym salý kerek — depýtat
ASTANA. KAZINFORM — Toyota Alphard pen Estima kólikterimen qalalaralyq jolaýshylar tasymalyna tolyq tyıym salý kerek. Bul týraly Májilistiń jalpy otyrysynda depýtat Elnur Beısenbaev aıtty.
— 2025 jyldyń 10 aıynda jol-kólik oqıǵalarynyń sany 27 paıyzǵa artty. Taksı qyzmetterinde oń jaq róldi kólikterdi qoldanýǵa tyıym salynǵanyna qaramastan, zańsyz júrgizýshiler jumysyn jalǵastyryp otyr. Al agregatorlar baqylaýdy qamtamasyz etpeıdi. Oń jaq róldi Toyota Alphard jáne Estima kólikteri jaman ataqqa ıe boldy. Ózderińiz biletindeı, bıyl shildede eki kún ishinde Jambyl jáne Almaty oblystarynda Alfard kólikteriniń qatysýymen eki iri jol apaty boldy. Sonyń saldarynan 10 adam qaza taýyp, taǵy tórteýi jaraqat aldy. Oń jaq róldi kólikterdi jolaýshylar kez kelgen kommertsııalyq ta, qalaaralyq ta tasymaldaýǵa qoldanýǵa tolyq jáne sózsiz tyıym salý qajet, — dedi Ernur Beısenbaev.
Aıta keteıik, tamyzda Aqtóbede Toyota Alphard júk kóligimen soqtyǵysyp, tórt adam mert boldy. Al odan bir aı buryn Almaty-Bishkek jolynda taǵy da Toyota Alphard traktorǵa soqtyǵysyp, 6 adam qaza tapty.