Toyota AQSh-tan 31 myńǵa jýyq gıbrıdti RAV4 kóligin keri qaıtaryp jatyr
ASTANA. KAZINFORM — AQSh-tyń Ulttyq jol qozǵalysy qaýipsizdigi basqarmasy (NHTSA) 2026 jylǵy RAV 4 modelderindegi aqaý joǵary jyldamdyqta gıbrıdti júıeniń óship qalýyna ákep soǵýy múmkin ekenin eskertedi, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.
Toyota kompanııasy baǵdarlamalyq jasaqtamadaǵy aqaýǵa baılanysty AQSh-ta 2026 jylǵy 30 978 dana RAV4 Plug-in gıbrıdti kóligin keri qaıtaryp jatyr. Aqaý kóliktiń gıbrıdti júıesiniń qozǵalys kezinde kenetten isten shyǵýyna sebep bolady.
NHTSA málimetinshe, motor-generatordy basqarý júıesindegi olqylyq joǵary jyldamdyqta gıbrıdti júıeniń qýatyn azaıtyp, onyń óshýine ákeledi.
NHTSA bul aqaý apat qaýpin kúsheıtýi múmkin ekenin eskertti.
AQSh-taǵy Toyota dılerleri máseleni sheshý úshin tıisti baǵdarlamalyq jasaqtamany tegin jańartady.
Toyota kompanııasy tıisti kólik ıelerine jeltoqsan aıynyń basynda habarlama jiberetinin málimdedi.
Buǵan deıin Kia kompanııasy órt shyǵý qaýpine baılanysty AQSh-ta 460 myńnan astam kóligin jóndeý úshin keri qaıtaratynyn habarlaǵan edi.
