Toıly Qurbanov: Qazaqstandyq volonterler BUU qurylymynda jumys istep júr

NUR-SULTAN. QazAqparat – Volonterler - zamanymyzdyń naǵyz batyrlary. Olar ózin qoǵamǵa jany ashıtyn azamat, jańashyl ári janashyr retinde kórsete bildi. Memlekettiń senimdi seriktesteri, ásirese halyqtyń osal toptarymen jumys júrgizýde naǵyz maman ekenin dáleldedi. Memleket basshysynyń qatysýymen ótken Volonterler jylynyń resmı jabylýy kezinde BUU Eriktiler baǵdarlamasynyń atqarýshy úılestirýshisi mindetin atqaratyn Toıly Qurbanov osylaı dedi, dep habarlaıdy QazAqparat tilshisi.

«Búgin Qazaqstanda Volonterler jyly qorytyndylanyp jatyr. Memleket basshysynyń bastamasymen, barlyǵyńyzdyń orasan zor eńbegińizdiń arqasynda Qazaqstanda volonterlar jumysynyń tynysy ashyla tústi. Qazaqstandaǵy volonterlerdiń tańǵalarlyq nátıjeleri ózdiginen bola salǵan joq. Shynynda da, 2020 jylǵa qaraı elimizde eriktilikti damytýdyń berik negizi daıyndaldy: arnaıy zań qabyldandy, respýblıkalyq jáne aımaqtyq deńgeıde eriktilerdi damytýǵa kóńil bólindi, onlaın-platformalar iske qosyldy», - deıdi Toıly Qurbanov.

Ol BUU Eriktiler baǵdarlamasy 1993 jyldan beri ornaǵan yntymaqtastyqty baǵalaıtynyn atap ótti.

«Biz sizdermen zań jobasy boıynsha da, jol kartasy boıynsha da birge jumys istedik. Osy jyly maqsatty túrde Qazaqstannan volonterler Azııa, Afrıka jáne Taıaý Shyǵystaǵy BUU qurylymdaryna jiberildi. Biz búgingi forýmdy tek Qazaqstandaǵy eriktiler jylyna arnalǵan epılogtyń bir túri sanamaımyz. Sonymen qatar bolashaqta Qazaqstandaǵy ulttyq jáne halyqaralyq volonterlikti odan da senimdi ári progressıvti damytýdyń prology retinde qarastyramyz», - dep atap ótti ol.

Toılı Qurbanov BUU Eriktiler baǵdarlamasy aıasynda birlesken jumys jalǵasyn tabatynyn aıtyp ótti.

Aıta keterligi, BUU Eriktiler baǵdarlamasy aıasynda qazaqstandyq 7 volonter Iordanııa, Kenııa, Taıland jáne Túrkııada jumys istep júr.