Toıhanalar men karaoke-barlardyń avtorlyq quqyq tólemderi qashan tsıfrlandyrylady
ASTANA. KAZINFORM – Mádenıet jáne aqparat mınıstriniń orynbasary Evgenıı Kochetov Úkimet otyrysynan keıin ótken baspasóz máslıhatynda toıhanalar men karaoke-barlardyń avtorlyq quqyq tólemderin tsıfrlandyrý týraly pikir bildirdi.
- Toıhanalar men karaoke barlardyń avtorlyq quqyq ıelerine tóleıtin jarnasyn tsıfrlandyrý qashan jáne qalaı uıymdastyrylady? - dep surady jýrnalıst.
Vıtse-mınıstr bul máseleni óz vedomstvosy Ádilet mınıstrligimen birge qadaǵalaıtynyn eske saldy.
- Qazir is-sharalar keshenin pysyqtap jatyrmyz. Onyń ishinde ózińiz aıtyp otyrǵan avtorlyq quqyq, avtorlyq quqyq ıelerine tólenetin ótemaqy qanshalyqty ádiletti degen másele de bar. Bul baǵytta belgili bir alǵa jyljý da bar. Senat depýtattarynyń toby ózderiniń túzetýlerin ázirlegen. Meniń bilýimshe, Ádilet mınıstrligi osy ózgertýlerdiń bárin qadaǵalap otyr. Biz de kreatıvti ındýstrııa ókilderimen tikeleı jumys isteıtin ýákiletti organ retinde baqylap otyrmyz. Onyń ishinde «Meıramhanalar men karaokelerdiń avtorlyq quqyq ıelerine tóleıtin aqysy ádiletti me?» degen sııaqty suraqtar da bar, - dedi Evgenıı Kochetov.
Sondaı-aq ol avtorlarlyq quqyq ıeleriniń óz týyndylarynyń oınatylýynan alatyn tólemaqylaryna baılanysty suraq kóp túsetinin aıtty.
- Men sál kúte turýdy usynar edim. Óıtkeni tsıfrlandyrý sharalary endi ǵana talqylanyp jatyr. Túrli usynystar aıtylyp jatyr. Árıne, tólemderdiń aqysy qanshalyqty ádiletti degen suraq birinshi kezekte tur, - dedi mınıstrdiń orynbasary.
Buǵan deıin Úkimet avtorlyq quqyq máselesine memlekettik monopolııa engizý usynysyn qoldamaı tastaǵanyn jazǵan edik.