Toıhana ıeleri aldyn ala tólem júrgizgen azamattarǵa 5 mln teńgeni qaıtaryp berdi
«Osydan birneshe apta buryn ǵana Prezıdent Qasym-Jomart Toqaev tutynýshylardyń quqyǵyn qorǵaý týraly zańnamaǵa engizilgen ózgeristerge qol qoıdy. Osy «alańdaǵy» tutynýshy men satýshynyń arasyndaǵy kelissóz júrgizýshi retindegi úkimettik emes uıymdardy men belsendi jumys júrgizýge shaqyramyn. Al jańa normalar ázirge tolyq iske asyrylmaı tur. ÚEU men satýshylar oıynnyń jańa ári qatań erejesimen oınaýdy úırene bastady. Al Saýda jáne ıntegratsııa mınıstrliginiń tutynýshylardyń quqyǵyn qorǵaý týraly komıteti qatardaǵy qazaqstandyqtardyń quqyǵyn qorǵaýǵa májbúr», - dep jazdy QR Saýda jáne ıntegratsııa mınıstri Baqyt Sultanov Facebook -tegi paraqshasynda.
Baqyt Sultanov bes aıdyń ishinde atqarylǵan jumystar týraly statıstıkalyq málimettermen bólisti.
«Ózderińiz biletindeı, naýryz aıynda azamattarǵa áleýmettik qashyqtyqty saqtaý týraly keńes aıtyla bastaǵan edi. Osydan baryp, josparlanǵan kontsertter men toılar bolmaıtyn boldy. Alaıda uıymdastyrýshylar bılettiń aqshasyn qaıtarýǵa asyqpady. 2020 jyldyń 5 aıynda tutynýshylardyń quqyǵyn qorǵaý týraly komıtetine bolmaı qalǵan kontsertter boıynsha («Rýkı Vverh» toby, Nur-Sultan qalasyndaǵy Lıýbovı Ýspenskoı, Belgorodtaǵy «Halyq shyǵarmashylyǵy» festıvali, «Astana – Opera» teatrynyń qoıylymy men taǵy basqa) 29 bılet boıynsha 15 ótinim kelip tústi. Mundaǵy jalpy soma - 615 620 teńge. Dese de 11 shaǵym boıynsha jumys aıaqtalyp, tutynýshylarǵa 615 620 teńge aqsha qaıtarylyp berdi. 4 shaǵym boıynsha jumys júrgizilýde», - dep jazady mınıstr.
Sonymen qatar Baqyt Sultanov meıramhanalar men toıhanalarda ótpeı qalǵan otbasylyq saltanatty sharalardyń qarajatyn qaıtarý boıynsha 47 ótinim kelip túskenin jazady. Qazaqstandyqtar osylaısha toıhana men meıramhana ıelerinen jalpy somasy 7,5 mln teńgeni qaıtaryp berýdi suraǵan. Qazirdiń ózinde osy somanyń 5 mln teńgesi qaıtarylǵany habarlanyp otyr.
Sondaı-aq mınıstr týrızm salasyna toqtaldy.
«Bizdiń aýmaqtyq departamentterge bolmaı qalǵan týrıstik týrlar boıynsha jalpy somasy 24 158 466 teńgeniń (23 487 016 teńge – sheteldegi demalys, 671 450 teńgesi el ishindegi demalys boıynsha) 85 shaǵymy tústi. Tutynýshylarǵa qazirgi tańda 4 250 202 teńge qaıtaryldy. Sonymen birge keıbir ótinimder boıynsha týr merzimin shegerý týraly kelisimge qol jetkizildi», - dep jazdy Baqyt Sultanov Facebook-tegi paraqshasynda.
Mınıstr tutynýshylardyń quqyǵyn qorǵaý boıynsha jańa normalardyń kúshine enýimen tutynýshylar men satýshylardyń kelissózderi jaqsara túsetinine senim bildirdi.
«Іsti komıtetiń qaraýyna jetkizgenshe bıznes úshin tutynýshymen kelissózge kelý – tıimdi bola túsedi. Sebebi jaýapty organ qazir deldal retinde júrgizýmen birge satýshy zań talaptaryn oryndamaǵan jaǵdaıda aıyppul salýǵa da quqyly», - dedi ol.
