Toıǵa barǵan qonaqtar astan ýlanyp qaldy - Qyzylorda oblysy
QYZYLORDA. QazAqparat - Jańaqorǵan aýdandyq tutynýshylar quqyqtaryn qorǵaý basqarmasy jáne aýdandyq aýrýhananyń juqpaly aýrýlar bólimi bir top adamnyń astan ýlanǵanǵany týraly oqıǵany tirkedi.
Jańaqorǵan aýdandyq ákimdiginiń baspasóz qyzmetiniń habarlaýynsha, oqıǵa 2 sáýir kúni saǵat keshke «Aısulý-1» meıramhanasynda 40 jasqa tolǵan kent turǵynynyń toıyna barǵan qonaqtar arasynan tirkeldi.
Naýqastar 2 táýlikten keıin dene qyzýynyń kóterilýi, qusý, ish ótý, tábetiniń tómendeýi, jalpy álsizdik ıntoksıkatsııalyq belgilerimen jedel járdem arqyly jáne ózdikterinen joldamasyz kelip qaralǵan. Olardan taldaýlar alynyp, bakterııalogııalyq zerthanaǵa jiberildi.
«Búginde naýqastardyń densaýlyǵy ortasha birqalypty. Aýrý oshaǵynda epıdemıologııalyq zertteý jumysy júrgizilýde», - deıdi aýdandyq tutynýshylar quqyqtaryn qorǵaý basqarmasynyń basshysy A.Turǵanbaev.
