Toıdan keıingi tóbeles dersiń - Qýat Hamıtov Konor men Habıbtiń shoýy jaıly
ASTANA. QazAqparat - MMA sportynan Qazaqstannyń tanymal sportshylarynyń biri Qýat «Naıman» Hamıtov ırlandııalyq Konor Makgregor men reseılik Habıb Nýrmogamedovtyń jekpe-jegine qatysty pikirin bildirdi, dep habarlaıdy QazAqparat tilshisi.
Qazaqstandyq sportshy óz pikirin ınstagram paraqshasynda qaldyrdy.
«Bárinen buryn maǵan jekpe-jekten keıingi tóbeles unady. Bul tóbeles meniń esime qazaqtyń toıynan keıingi jaǵajyrtysty esime túsirip jiberdi. Sózsiz, bul týrnır tarıhta óz ornyn tabar. Mundaı shoý uıymdastyrǵan jigitterge rahmet. Ekeýi de naǵyz batyrlar», - dep jazdy Qýat Hamıtov.
Eske sala ketsek, búgin AQSh-tyń Las-Vegas qalasyndaǵy «Tı-Mobaıl Arenada» aralas jekpe-jektiń (MMA) tarıhyndaǵy eń aıtýly aıqastardyń biri, UFC 229 týrnıriniń aqtyq saıysy - ırlandııalyq Konor Makgregor men reseılik Habıb Nýrmagomedovtyń aıqasy aıaqtalǵan bolatyn. Jekpe-jekte reseılik ırlandııalyqty qylqyndyrý ádisimen jeńdi.
Álemdik dárejede «Ǵasyr jekpe-jegi» atanǵan aıqastyń shýy áli basylmaıtyn sekildi. UFC 229 týrnırinde búgin 27-shi jeńisine jetken reseılik Habıb Nýrmogamedov syıaqysyn ala almaýy yqtımal. Buǵan daǵystandyqtyń aıqastan keıin Konor Makgregordyń dostaryna tap berýi sebep bolyp otyr.
UFC prezıdenti Deın Ýaıt jekpe-jek aıaqtalǵannan keıin tipti komıssııa Habıbti tıtýlynan aıyrýy múmkin ekenin de aıtyp qaldy. Onyń sózine qaraǵanda, bul shýdyń aqyry sotqa ulasýy múmkin.
