Toıdaǵy shýly vıdeo: tilektiń ornyna «ýaǵyz» aıtqan adamnyń ústinen qylmystyq is qozǵaldy
TÚRKІSTAN. KAZINFORM – Túrkistan oblysynda toıda túsirilgen vıdeoǵa qatysty polıtsııa qylmystyq is qozǵady.
Túrkistan oblysynda ótken toılardyń birinde tilektiń ornyna dinı «ýaǵyz» aıtqan er adamnyń vıdeosy áleýmettik jelide keńinen tarady.
Beınejazbada ol toılarda araqtyń qoıylmaı júrgenin quptaıtynyn aıtyp, endigi kezekte mýzykadan bas tartý kerektigin jetkizgen. Sondaı-aq erler men áıelderdiń birge otyrýyn sharıǵatqa qaıshy dep baǵalap, musylmandardyń dinı talaptardy qatań ustanýy qajet ekenin aıtqan.
Іshki ister mınıstrligi bul vıdeoǵa qatysty resmı málimdeme jasady.
– Áleýmettik jelilerge júrgizilgen monıtorıng barysynda Túrkistan oblysynyń 66 jastaǵy turǵynynyń dinı jáne áleýmettik arazdyqty qozdyrý belgileri bar jarııa málimdemeleri qamtylǵan beınejazba anyqtaldy. Atalǵan fakti boıynsha polıtsııa qylmystyq is qozǵady, – delingen habarlamada.
Mınıstrlik Qazaqstan Konstıtýtsııasy árbir azamattyń jynysyna, tegine, áleýmettik jaǵdaıyna, dinge kózqarasyna jáne ózge de mán-jaılarǵa qaramastan quqyǵy men bostandyǵynyń teńdigin qamtamasyz etetinin atap ótti.
– Adamnyń ar-namysy men qadir-qasıetin qorlaýǵa, dinı, áleýmettik nemese ózge de belgileri boıynsha kemsitýge baǵyttalǵan kez kelgen jarııa úndeýler, sondaı-aq qoǵamdyq kelisim men birlikke nuqsan keltirýi múmkin áreketterge jol berilmeıdi, – delingen resmı málimdemede.
Sondaı-aq vedomstvo sóz bostandyǵy jaýapkershilikten bosatpaıtynyn atap ótip, zań talaptaryn buzý belgileri bar kez kelgen jarııa málimdemege quqyqtyq baǵa beriletinin eskertti.
Buǵan deıin dombyrany haram degen aqtóbelik bas bostandyǵynan aıyrylǵany týraly habarlaǵan edik.
