Toıda erler men áıelderdiń bólek otyrýy dindarlyq emes – Nurlan Baıjigituly
ASTANA. KAZINFORM — Qoǵamda toı kezinde erler men áıelderdiń bólek otyrýy kerek degen pikir jıi talqylanady. Imam Nurlan Baıjigituly bul máselege qatysty pikir bildirip, Qazaqstannyń zaıyrly memleket ekenin jáne toıdaǵy dinı talaptardy qazaqtyń dástúri men bolmysynan bólek qaraýǵa bolmaıtynyn aıtty.
— Biz, birinshiden, dinı memleket emespiz, biz — zaıyrly qoǵambyz. Zaıyrlylyqtyń sıpaty bizde bolýy kerek. Bul dinsizdik qoǵam degen sóz emes. Dinniń talabyn bizdiń memleketimizdiń zańnamasy tolyǵymen atqarady desem, ras shyǵar, — dedi Nurlan Baıjigituly.
Imamnyń aıtýynsha, erler men áıelderdi toıda mindetti túrde bólek otyrǵyzý máselesin dindarlyqtyń negizgi belgisi retinde kórsetý durys emes.
— Al endi toıda jeke otyrý, bólek otyrý bul — sharasyzdardyń sózi. Dindi radıkaldyqqa buryp, sharasyzdyqqa alyp baratyn dúnıe. Mynaý sýǵa batqan adam janyn saqtap qalý úshin bir aǵashqa, bir bórenege jabysqan sııaqty, — dedi ol.
Nurlan Baıjigituly mundaı tártiptiń keı jaǵdaıda kózboıaýshylyqqa aınalýy múmkin ekenin atap ótti.
— Jeke-jeke otyryp alyp, keıin bári aralasatyn bolsa, onyń ne keregi bar? Mysaly, erler myna jaqta, áıelder myna jaqta otyrady. Al keıin bári aralasady, birge bıleıdi. Sonda bul kózboıaýshylyqtyń ne keregi bar? Kim kimdi aldap jatyr? — dedi ımam.
Imamnyń aıtýynsha, toıda adamdar óz bolmysynan alshaqtap, syrt kózge ózin basqa qyrynan kórsetýge tyryspaýy kerek. Ol shynaıy bolyp, shekten shyqpaý mańyzdy ekenin aıtyp, «Toıda qandaı bolsań, úıde de sondaı bol» degen ustanymdy alǵa tartty. Sondaı-aq bul oıdy Imam Aǵzamnyń adamnyń ishki bolmysy men syrtqy kórinisi úılesýi kerek degen sózimen baılanystyrdy.
— Toıda er adam áıelin qadirlegenine jaman bola ma? Joq, jaman bolmaıdy. Er adam áıelin qadirlegeni, qudaı qosqan jaryn qorǵaýshy retinde qolyn demep, turǵyzǵany turǵan eshteńesi joq nárse. Bul namystanatyn nárse emes, — dedi Nurlan Baıjigituly.
Ol toıda da, kúndelikti ómirde de shynaıylyqty saqtaýdyń mańyzdy ekenin atap ótti.
— Sondyqtan toıda da, ómirde de shynaıy bolý kerek. Qazaqtyń bolmysyna, ómirine, turmysyna saı bolý kerek. Joqty bar etip kórsetýge, eldiń aldynda ózińdi basqa adam etip kórsetýge tyrysýdyń qajeti joq, — dep túıindedi Nurlan Baıjigituly.
Buǵan deıin qoǵamda toıshyldyqtyń mańyzy qandaı ekenin jazǵanbyz.
