Toı-jıynǵa barǵan: Astana jedel járdem qyzmetkerleri KVI juqtyrǵan naýqastar týraly aıtty

NUR-SULTAN. QazAqparat - Elordada kún saıyn 1300-deı adamnan koronavırýs anyqtalady. Dárigerlerdiń aıtýynsha, reanımatsııa bólimine ekpe ektirmegen jəne óz betimen em qabyldaǵan patsıentter túsedi, dep habarlaıdy QazAqparat ákimdiktiń resmı saıtyna silteme jasap.

Ahýal ortalyǵynyń málimetinshe, 30 shilde kúni tańerteń KVI bar 238 patsıent jansaqtaý bóliminde, 45 adam ókpeni jasandy jeldetý apparatynda jatyr.

Esterińizge sala keteıik, ahýal ortalyǵy 2020 jyldyń maýsym aıynda qalanyń medıtsınalyq mekemeleriniń jumysyn úılestirý jáne koronavırýs anyqtalǵan patsıentterdi statsıonarlarǵa birkelki bólý úshin qurylǵan.

«Ótken táýlikte 347 adam aýrýhanaǵa jatqyzyldy. Kórip otyrǵanymyzdaı, jaǵdaı máz emes. Oǵan qosa koronavırýsy bar ambýlatorııalyq naýqastar sany da artty. Eger ótken aptada koronavırýspen aýyratyn 10 myńnan astam adam úıde emdelse, búginde bul san 12 myńnan asyp ketti «, - dedi mamandar.

Mamandardyń aıtýynsha, naýqastar sanynyń ósýine baılanysty jedel járdem, onyń ishinde MSAK uıymdarynyń janyndaǵy mobıldi brıgadalarǵa úlken júkteme túsýde.

«Qońyraý sany 3500-ge deıin jetedi. Koronavırýsqa baılanysty qońyraýlar táýligine 300-ge deıin jetti. KVI belgileri bar patsıentterdiń kópshiligi (90% - dan astamy) ekpe almaǵan naýqastar jáne medıtsınalyq kómekke kesh júginetinder, ózin-ózi emdeýmen aınalysqandar. Brıgadalar patsıentterge kelgende, olardyń biriniń sóıleýge áli kelmeı, keıbiri áreń dem alyp jatady. Statsıonarǵa barar jolda olar nasharlaı bastaıdy, biz qoldan kelgendi jasaımyz», - deıdi JMK brıgadasynyń feldsheri Azamat Álkenov.

Mamandardyń aıtýynsha, kóbine saltanatty is-sharalarǵa qatysqan jáne medıtsınalyq maska taǵý talaptaryn elemegen azamattar jedel járdem qyzmetin jıi shaqyrady.

Eske sala keteıik, elorda ákiminiń tapsyrmasy boıynsha mobıldi brıgadalar sany eki ese artty.

Bul jedel járdemniń, qalanyń medıtsınalyq mekemeleriniń jumysyn aıtarlyqtaı jeńildetýge kómektesedi.

Tek vaktsınatsııa sizdiń jáne jaqyn adamdaryńyzdyń densaýlyǵyn qorǵaýǵa múmkindik beredi.