Toı toılaýǵa asyqpaıyq - Altynbek Qorazbaev
NUR-SULTAN. QazAqparat – Ánshi, kompozıtor, Qazaqstannyń Halyq ártisi Altynbek Qorazbaev Qazaqstan halqyn Jańa jyl merekesinde karantın talaptaryn saqtaýǵa shaqyryp, pikir bildirdi, dep habarlaıdy «QazAqparat» tilshisi.
«Mereke qarsańynda turmyz. Sondyqtan barsha qazaqstandyqtardy saqtyq sharalaryn qatań túrde saqtaýǵa shaqyramyn. Kórshiles Reseı elinde barlyq sharalardy ótkizýge tyıym saldy. Bizde de karantın kúsheıip keledi. Halqymyz aman bolsa, áli talaı toıǵa barady, merekeni atap ótedi. Aldymyzda qazaq halqynyń jańa jyly - Naýryz merekesi kele jatyr. Ol ýaqytqa deıin indettiń beti qaıtyp, jaǵdaı jaqsarady degen úlken úmit bar. Toı toılaýǵa asyqpaıyq. Tártipke baǵynyp, aq halatty abzal jandardyń kúndelikti aıtyp jatqan saqtyq sharalary týraly aqyl-keńesine nazar salaıyq», - dedi Altynbek Qorazbaev.
Qazaqstannyń Halyq ártisi qazaq halqyn Jańa jyl merekesimen quttyqtap, keler jyly ár otbasyǵa tabys pen birlik tiledi.
