Toı ótkizýge meıramhanasyn bergen 400-ge tarta kásipkerge aıyppul salyndy

NUR-SULTAN. QazAqparat – Toı nemese eske alý sharasyn ótkizýge nysanyn bergen 394 kásipkerge aıyppul salynǵan. Bul týraly Densaýlyq saqtaý mınıstrligi QazAqparat agenttiginiń resmı saýalyna bergen jaýabynda habarlady.

«Tyıymdy elemeı toı, eske alý sharalaryn (banketter, úılený toılary, mereıtoılar, eske alý) ótkizýge nysanyn bergen kásip ıelerine qatysty quqyq buzýshylyq týraly 394 hattama toltyryldy», - dep jaýap berdi mınıstrlik QazAqparattyń resmı saýalyna.

Ákimshilik quqyq buzýshylyq týraly kodekstiń 425-babynyń 1-tarmaǵyna sáıkes atalǵan adamdar (shaǵyn kásipkerlik sýbektileri nemese kommertsııalyq emes uıymdar) 230 AEK aıyppul qarastyrylǵan.

Sonymen qatar, tyıymdy elemeı toı, eske alý sharalaryn (banketter, úılený toılary, mereıtoılar, eske alý) úıinde ótkizgen jeke tulǵalarǵa qatysty quqyq buzýshylyq boıynsha 716 hattama toltyrylǵan. Ákimshilik kodekstiń 425-babynyń 1-tarmaǵyna sáıkes olarǵa 30 AEK aıyppul salynǵan.

Eske sala ketsek buǵan deıin Densaýlyq saqtaý mınıstrligi karantındik shekteýlerge qaramastan eń kóp toı ótken óńirlerdi ataǵan bolatyn. Olardyń qatarynda Qyzylorda, Túrkistan, Aqtóbe, Qaraǵandy, Atyraý, Batys Qazaqstan, Almaty óńirleri tur.