Qazaqstan qalalarynda qoı baǵasy qansha turady
Qazaqstanda keıbir otbasy aıyna bir qoı satyp alady. Keıbiri ózderi baǵady, al endi biri senimdi adamdardan alǵandy jón kóredi. Kazinform ár qalada qoı baǵasy qansha turatynyn bildi.
Qoı baǵasy onyń salmaǵy men tuqymyna qaraı ártúrli. Eń tómen baǵa Pavlodarda. Munda qoı quny 30 myń teńgeden bastalady. Astana men Almatyda qoı 35 myń teńgeden satylyp jatyr. Biraq elordada baǵa 85 myń, al Almatyda 150 myń teńgege deıin jetedi.
Taldyqorǵan, Atyraý, Kókshetaý, Qyzylorda, Taraz ben Shymkentte baǵa 40 myń teńgeden bastalady. Shymkentte qoı baǵasy salmaǵy men tuqymyna qaraı 140 myń teńgege deıin jetedi. Al Tarazda Qurban aıt kezinde qoı baǵasy 200 myń teńgege deıin kóteriledi.
Semeı, Qostanaı men Óskemende qoı baǵasy 45-60 myń teńge aralyǵynda. Oralda baǵa 45-80 myń teńge bolyp tur. Al Qaraǵandyda qoı baǵasy 150 myń teńgege deıin jetedi.
Jezqazǵan men Túrkistanda qoı baǵasy 50 myń teńgeden bastalyp, keıde 120 myń teńgege deıin jetedi. Ózgelerge qaraǵanda Aqtaýda baǵa joǵary. Munda Shopan ata tóli 70 myń teńgeden bastalyp, 120 myń teńgege deıin jetedi.
Satýshylar qoı soıý qyzmetin qatar usynady. Óskemende bul qyzmet 2-5 myń teńge aralyǵynda, al Túrkistanda 3-5 myń teńge turady. Qyzylordada qoıdy 3-4 myń, Aqtóbede 4 myń, Petropavlda 5-8 myń, Aqtaýda 5-10 myń, Qaraǵandyda 10 myń teńgege soıyp beredi. Qostanaıda dinı jolmen qoı soıý qyzmeti 10-20 myń teńge turady. Biraq qazaqstandyqtar qoıdy satyp alyp, ózderi soıǵandy jón kóredi.
Eske salsaq, buǵan deıin biz qazy, kartop baǵasyn salystyrǵan edik.