Toı mádenıetin bir izge túsiretin ereje ázirleý qajet

BÝRABAI. KAZINFORM – Toı mádenıetin bir izge túsiretin ereje ázirleý qajet. Bul týraly Ulttyq quryltaıdyń IV otyrysynda quryltaı múshesi Bekzat Altynbekov aıtty.

- Búgingi jahandaný dáýirinde ulttyq salt-dástúrimiz ben mádenıetimizdi, til tazalyǵy men urpaq sabaqtastyǵy sekildi qundylyqtardy saqtap qalý ózekti másele bolyp otyrǵany málim. Qazaqtyń búgingi tańdaǵy torqaly toı, topyraqty ólimde jasalatyn joralǵylary, óz betterimen qabyldap alǵan ereje-tártibi qundylyqqa qundaqtalǵan ulttyq salt-dástúrimizge syzat túsirýde. Al salt-dástúr degenimiz – ulystardy biriktirýshi uly kúsh. Qazirgi jıyn-toılardaǵy beıádep sóz, anaıy anekdot, ebedeısiz oıyn, asabalar mádenıetsizdigi belgili bir deńgeıde ortaq qoǵamdyq baqylaýǵa alynýy qajet áleýmettik problemaǵa aınalyp barady, - dedi ol.

Onyń atap ótýinshe, mundaı óreskel áreketterdi tyıý úshin ádep erejesin qabyldaý qajet.

- Óıtkeni jıyn-toı – tárbıeniń eń basty quraldarynyń biri. Bul álde bireýdiń qyzyǵyna aralasyp, qazan-oshaǵy men dastarhanyn bıleý emes, ulttyq qundylyqtardy saqtaýdyń birden bir joly dep aıtqym keledi. Toı mádenıetin bir izge túsiretin ereje jobasyn ázirlep, bul máselege qoǵamdyq baqylaýdy kúsheıtý kerek degen oıdamyn, - dedi Bekzat Altynbekov.

Aıta keteıik, Býrabaıda Ulttyq quryltaıdyń IV otyrysy ótip jatyr.