Toı kortejin 90-jyldardyń úlgisinde jasaǵan aqtóbelikter jazalandy
AQTÓBE. KAZINFORM – Toı kortejine qatysqan júrgizýshiler jol qaýipsizdigi erejesin saqtamady. Júrgizýshiler ákimshilik jaýapqa tartyldy.
Zań buzý áreketi Aqtóbe oblysy Qarǵaly aýdanynda tirkeldi. Toı kortejine qatysqandar kúndiz kóliktiń jaryǵyn jaǵyp, dybystyq sıgnal bergen. Sonymen birge adamdar júk kóligine minip alǵan.
- Jelide 90-jyldardaǵy toılardy eske túsirgen beınejazba qyzý talqylanyp jatyr. Merekelik kóńil-kúı jol qaýipsizdigi talaptaryn saqtaýǵa kedergi bolmaýy tıis. Polıtsııa qyzmetkerleri beınejazbaǵa júrgizgen monıtorıng barysynda birneshe kólik júrgizýshisiniń jol qozǵalysy erejelerin buzǵanyn anyqtady. Jolaýshylardy kólik kabınasynan tys tasymaldap, sondaı-aq kúndiz syrtqy jaryq berý quraldary men dybystyq sıgnaldardy paıdalanǵan. Olardyń Qarǵaly aýdanynyń turǵyndary ekeni belgili boldy. Qoldanystaǵy zańnamaǵa sáıkes ákimshilik jaýapqa tartyldy,- dedi Aqtóbe oblystyq PD baspasóz qyzmeti.
Eske salsaq, mundaı zań buzýshylyq Qyzylorda oblysynda da tirkeldi. Manevr jasaý talaptaryn saqtamaý, jol qozǵalysyna qatysýshylarǵa avarııalyq jaǵdaı týǵyzý, qaýipsizdik beldigin taqpaı kólik basqarý, sondaı-aq kólik quralyna arnaıy jaryq sıgnaldaryn berýge arnalǵan qurylǵylardy ornatý tártibin buzý faktileri tirkeldi.
