Toı-dýmanda qushaqtasyp sýretke túsken aqtóbelik sheneýnikter tártiptik jazaǵa tartyldy
AQTÓBE. QazAqparat - Aqtóbede memlekettik sheneýnikter ishimdik iship, kólik júrgizgeni, qyzmettik kólikti jeke jumystaryna paıdalanǵany úshin tártiptik jazaǵa tartylyp jatyr. Kóbi toı-dýmanda, demalysta sýretke túsip, áleýmettik jelige júktegeni úshin jazalandy, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń oblystyq departamenti óńirdegi 5 myńnan astam memlekettik qyzmetshiniń jumysyn baqylap otyr. Jat qylyq kórsetkenderi anyqtalyp, Ádep kodeksine saı jazalanady. Qadamyn shalys basatyn sheneýnikter az emes. Máselen, Shalqar aýdandyq memlekettik kirister basqarmasynyń basshysy Álibekov sýpermarket ishine kirip, tegin ishimdik berýdi talap etken. Ádep kodeksin buzǵan sheneýnik tártiptik jazaǵa tartyldy.
«Yrǵyz aýdandyq aýyl sharýashylyǵy bóliminiń bas mamany Omarov avtokólikti mas kúıinde júrgizgeni úshin tártiptik jazaǵa tartyldy. Memlekettik qyzmetshilerdi keshendi attestatsııadan ótkizý kezinde memlekettik qyzmetshilerimizdiń ishimdik ishken kúıde kólik júrgizgeni úshin ákimshilik jaýapkershilikke tartylǵandary anyqtaldy. Sonymen qatar, Aqtóbe qalalyq turǵyn úı qoryn esepke alý sektorynyń meńgerýshisi Dúısekenova azamattarǵa dóreki sóılegeni úshin eskertý túrindegi tártiptik jazaǵa tartyldy»,- dedi QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń oblystyq departamenti basshysynyń orynbasary Mıra Bıbitova.
Qazirgi kezde memlekettik qyzmetshilerdiń áleýmettik jelilerdegi paraqshalary qatań baqylaýǵa alyndy. Monıtorıng júrgizilip, memlekettik qyzmetkershilerdiń oıyn-saýyq jáne shetelderdegi demalys oryndaryndaǵy fotosýretteri óshirildi. Olardyń arasynda iri basqarma qyzmetkerleri de bar. Máselen, áleýmettik jeliden Aqtóbe oblysy boıynsha tekserý komıssııasy, Kásipkerlek, Jer qoınaýyn paıdalaný men qorǵalýyn baqylaý, Kóliktik baqylaý, Memlekettik satyp alýlar, Mádenıet, muraǵattar jáne qujattama, Tilderdi damytý, Qurylys, sáýlet jáne qala qurylysy basqarmalary men Aqtóbe oblysy boıynsha orman sharýashylyǵy men janýar dúnıesi aýmaqtyq ınspektsııasy qyzmetkerleriniń sýretteri alynyp, olar tártiptik jazaǵa tartyldy.
«Toıǵa barasyń, týysqanyń sýretke túsirip, áleýmettik jelige salyp jiberedi. Keıde bul Ádep kodeksiniń talaptaryna saı kelmeıdi. Biz monıtorıng júrgizgen soń bul úrdis sap tyıyldy. Bári moıyndady, jazalandy. Kóbine dosymen qushaqtasyp túsken sýretter salynǵan. Selfı jasap, ernin shyǵarǵan, qolyn shoshaıtyp turǵan. Tipti demalysta sý jaǵasynda kýpalnıkpen túsken sýretteri bar. Bilmestikten sýretin saldy, qazir alyp tastady»,- dedi QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń oblystyq departamenti basshysy Q.Toqyshev.
Aıta keteıik, bıyl memlekettik qyzmetshilerge qatysty 28 tártiptik is qaraldy. Onyń 10-y Ádep kodeksiniń talaptaryn buzǵan. «Memlekettik qyzmetshilerdiń qyzmettik avtokólikti jeke maqsatta paıdalanýy ádetke aınalǵanyn kórsetip otyr. Máselen, №11 shyǵys sport túrleri boıynsha balalar jáne jasóspirimder mektebiniń dırektory qyzmetten tys ýaqytta dene shynyqtyrý jáne sport basqarmasyna bekitilgen kólikti jeke maqsatta paıdalanǵan. Sonymen qatar, Aqtóbe qalasy ákiminiń apparat basshysy men oblystyq kásipkerlik basqarmasy da jeke jumystaryna qyzmettik kólikpen júrgen»,- dedi M.Bıbitova.
