Totyqus kúıeýin atqan áıeldiń qylmysyn ashýǵa kómektesti
ASTANA. QazAqparat - AQSh-taǵy Mıchıgan shtatynyń Send Leık qalasynda 49 jastaǵy Glenna Darem 2015 jyly óziniń kúıeýi Martındi tapanshamen bes ret atyp óltiredi, keıin óz-ózine qol jumsaǵanymen, onysy sátsiz aıaqtalǵan.
Bul qaıǵyly jaǵdaıdyń jalǵyz kýágeri erli-zaıyptyǵa tıesili Bad esimdi-totyqus-jako boldy, dep habarlaıdy Sun.
Qusty Martınniń burynǵy áıeli Krıstına Keller alǵan. Totyqus jańa qojaıynynyń úıinde adam óltirý sátinde esine saqtap qalǵan sózderdi udaıy qaıtalaıtyn bolǵan. Ásirese, Bad eki túrli daýyspen «Quryp ket!», «Men qaıda baramyn?» jáne «Atpa!» degen sózderdi únemi aıtyp júrgen.
Glenna Daremnyń isi boıynsha sot otyrysy barysynda onyń sózderi áıelge qarsy dálelderdiń biri boldy. Áıel birinshi dárejedegi adam óltirý boıynsha aıypty dep tanyldy.
