Tótenshe jaǵdaılar salasynyń materıaldyq-tehnıkalyq qamtamasyz etilý jaǵdaıy múshkil - V. Bojko
ASTANA. Sáýirdiń 9-y. QazAqparat /Qanat Mámetqazyuly/ - Tótenshe jaǵdaılar salasynyń materıaldyq-tehnıkalyq qamtamasyz etilý jaǵdaıy múshkil.
Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Tótenshe jaǵdaılar mınıstri Vladımır Bojko osylaı málim etti, dep habarlaıdy QazAqparat.
«Búgingi kúni respýblıkamyzdaǵy qyzmet etetin órtke qarsy bólimshelerdi tıisti jaraqtandyrý boıynsha 1 myń 300-ge tarta arnaıy mashına jetispeıdi. Budan bólek tıisti norma boıynsha barlyq órt sóndirýshilerge tıesili órt sóndirýshiniń arnaıy kıimi de jetispeıdi, qarjylandyrý múldem qanaǵattanarlyqsyz. Sonymen birge, sońǵy jyldary arnaıy tehnıkalardy alýǵa da qarajat bólinbeı otyr. Mamandardy daıarlaıtyn Kókshetaý tehnıkalyq ınstıtýtynyń áleýeti de álsiz, bul ınstıtýtty akademııa mártebesine kóterý týraly burynnan másele kóterilip keledi. Bir sózben aıtqanda, Tótenshe jaǵdaılar mınıstrliginde materıaldyq-tehnıkalyq qamtamasyz etýge qatysty problemalar shash etekten», - dedi V. Bojko.
Sonymen birge, bıik ǵımarattar men nysandar boıynsha órt qaýipsizdigine toqtalǵan mınıstr, sońǵy jyldary bundaı sharalarǵa qajetti eshqandaı da jańa tehnıka satyp alynbaǵanyn alǵa tartty. Osyǵan oraı, V. Bojko aldaǵy ýaqytta depýtattar bıýdjetti talqylaǵanda, bul máseleni qaperde ustaýyn ótindi.
