Tótenshe jaǵdaılar salasynyń mamandary sýdaǵy jaısyz oqıǵalarǵa alańdaýly
ASTANA. 10 tamyz. QazAqparat /Aıdar Ospanalıev/ - Elimizde sýǵa túsý maýsymy bastalǵaly qaıǵyly jaǵdaılar sany arta túsýde.
1 maýsym men 7 tamyz aralyǵynda respýblıka boıynsha 265 adam sýǵa ketken. Bul málimettermen búgin jýrnalıstermen bolǵan brıfıngte Tótenshe jaǵdaılar mınıstrligi baspasóz qyzmetiniń aǵa ınjeneri Lıýbov Shaposhnıkova tanystyrdy.
Onyń derekterine qaraǵanda, ótken jyldyń sáıkes merziminde elde sýǵa ketkender sany 355 adamdy quraǵan. «Qazirgi tańda, ásirese, sýǵa batyp ketip jatqan balalardyń ólimi aldańdaýshylyq týdyrýda. Jaǵdaıdyń bulaısha qalyptasýyna azamattardyń sýǵa túsýdegi qarapaıym erejelerdi saqtamaýy men eresekterdiń óz balalaryn jiti baqylamaýy sebep bolyp otyr»,-deıdi aǵa ınjener.
Onyń sózine qaraǵanda, jyl basynan beri elimizdiń sýdan qutqarý qyzmetiniń ókilderi 1 myń 35 adamdy qutqarǵan. «Qaıǵyly oqıǵalar eń kóp oryn alǵan aımaq Almaty oblysy bolyp otyr. Onda 52 adam sýǵa ketken. Odan keıingi orynda Qaraǵandy oblysy tur. Bul aımaqta 38 adam sýdan ajal tapqan. Úshinshi oryn Shyǵys Qazaqstan oblysynyń úlesinde. Onda 30 adam kóz jumǵan. Odan keıingi oryndarda Atyraý, Ońtústik Qazaqstan oblystary tur»,-deıdi L.Shaposhnıkova.
Sondaı-aq ol sózinde sýǵa shomylýmen baılanysty jaısyz oqıǵalar demalys kúnderi men merekelerde kúrt artatyndyǵyn atap ótti.
Ótken demalys kúnderi, ıaǵnı 6-7 tamyzda respýblıka aýmaǵynda 11 adam sýǵa batyp ketken.
