Tótenshe jaǵdaılar salasynyń eskertýin elemegender qıyndyqqa tap boldy – TJM
NUR-SULTAN. QazAqparat – QR Tótenshe jaǵdaılar mınıstrligi qys mezgilinde júrgizilgen qutqarý jumystaryna qatysty málimetterdi jarııalady. Mınıstrliktiń derekterine qaraǵanda, qysta boranǵa qaramastan el turǵyndary eldi mekennen tys jerlerge saparǵa shyǵyp jatty, dep habarlaıdy QazAqparat.
«Tótenshe oqıǵa jáne qaýpti jaǵdaı týraly halyqty eskertý maqsatynda halyqtyń uıaly telefondaryna aýa raıynyń nasharlaýy týraly 3 896 SMS-habarlama, «Dármen» mobıldik qosymshasy arqyly 1 265 habarlama jiberildi. Aldyn ala jasalǵan eskertýlerge qaramastan, adamdar eldi mekenderden tys jerlerge shyǵyp, qar qursaýynda qalyp qoıyp jatty», - delingen mınıstrlik málimetinde.
Máselen, 2021 jylǵy 16 qańtarda Almaty oblysy Kerbulaq aýdanynda «Saryózek-Kóktal» respýblıkalyq mańyzy bar avtojolynda qar qursaýynan 80 adam, onyń ishinde eki balasy bar júkti áıel qutqaryldy. Qatty jelden osy joldyń 15 jáne 40 shaqyrymyndaǵy ýchaskeni qar basyp, saldarynan jolaýshylary bar avtokólikter qar qursaýynda qalyp qoıdy. Bul týraly Almaty oblysynyń TJD-ǵa habarlandy. Birinshi kezekte qutqarýshylar júkti áıel men balalaryn qar qursaýynan evakýatsııalady. Qutqarýshylar áıel men balalardy Saryózek kentinde turatyn týystaryna jetkizdi. Jol qyzmetteriniń qyzmetkerlerin, áskerı qyzmetshilerdi jáne jergilikti atqarýshy organdardy jumyldyra otyryp, avtojoldardy tazalaý jáne turyp qalǵan avtomashınalardy súırep shyǵarý jumystary júrgizildi. Keıinnen avtokólikter óz baǵyty boıynsha qozǵalysty jalǵastyrdy.
2021 jylǵy 25 aqpanda Qaraǵandy oblysynda eskertý jarııalandy. Aýa raıynyń qolaısyzdyǵyna baılanysty barlyq avtojoldarda kólik qozǵalysy jabyldy. TJ departamentiniń, 52859 áskerı bóliminiń, Apattar medıtsınasy ortalyǵynyń bólimsheleri joldarda 79 adamdy, onyń ishinde 7 balany qutqardy. Qutqarý jumystarynyń biri Shet aýdanynda júrgizildi. Qyzylqoı aýyly aýdanyndaǵy «Almaty-Ekaterınbýrg» avtojolynda qar qursaýynda toqtap qalǵan jedel medıtsınalyq járdem avtomobıli men jeńil avtokólikten 9 adam qutqaryldy. Qutqarylǵandardyń ishinde eki naýqas: ınfarkt alǵan er adam jáne júkti áıel jol talǵamaıtyn kólikpen Qaraǵandy qalasyna jetkizildi.
2021 jylǵy 13-15 naýryz aralyǵynda Shyǵys Qazaqstan oblysynda qar qar qursaýynan 164 adam, onyń ishinde 9 bala qutqaryldy, 63 tehnıkany súırep shyǵarýǵa kómek kórsetildi.
Aıta keteıik, qysqy kezeńde elimizde 1 722 adam, onyń ishinde 230 bala qutqaryldy, 1 300-den astam tehnıka qar qursaýynan shyǵaryldy.
