Tótenshe jaǵdaılar organy mektep dırektoryna bes jyl boıy aıyppul salyp kelgen
ASTANA. QazAqparat - Tótenshe jaǵdaılar organy mektep dırektoryna órt qaýipsizdigi talaptaryn saqtamaǵany úshin bes jyl qatarynan aıyppul salyp kelgen. Búgin Májilistiń Áleýmettik-mádenı damý komıtetiniń otyrysynda áleýmettik zertteýge súıengen depýtat Kamal Burhanov osylaı málim etti.
Toqtala keteıik, komıtet otyrysynda áleýmettik nysandardyń tekserilýi máseleleri talqylanǵan bolatyn. Osy taqyryp aıasynda depýtat Kamal Burhanov júrgizilgen arnaıy zertteýlerdiń qorytyndysy týraly baıandady. Saýalnamany anonımdik negizde júrgizilip, erteńgi kúni jaǵdaıdyń múldem qıyndap ketetinin oılaǵan áleýmettik nysan basshylary ózderiniń aty-jónderin kórsetýden múldem bas tartqan.
«Tótenshe jaǵdaılar organy sońǵy 5 jyl boıy bir mektepti tekserip, sol bes jyl boıyna órt qaýipsizdigi normalaryn saqtamaǵany úshin aıyppul salyp kelgen. Keńestik kezden kele jatqan mekteptiń tóbe jabyny qarapaıym saban qamyspen qaptalǵan eken. Shyndyǵynda, órt qaýipsizdigi talaptaryna sáıkes, mundaı tóbe jabyny jyl saıyn otqa berik arnaıy qurylys materıaldarymen qaptalýy kerek. Alaıda mektep dırektory jyl saıyn osy olqylyqty joıý týraly aýdandyq bilim bólimine ótinish jasaǵanymen, ol taraptan eshqandaı jaýap bolmaǵan. Nátıjesinde aıyppul jyl saıyn qaıtalana bergen», - deıdi K.Burhanov.
Onyń aıtýynsha, mektep bıýdjetinde jyl saıyn ondaı jumystar úshin qarajat qarastyrylmapty. Onyń esesine, tótenshe jaǵdaılar organy joǵary satyda otyrǵandar bul problemany sheshýge qulyq tanytpaǵanyn bile tura, mektep dırektoryna aıyppul salýdy jalǵastyryp kelgen.
«Kez-kelgen ýaqytta órt tutanýy múmkin álgi mektepte bala oqytý jalǵasyp keledi. Eger shynymen tótenshe jaǵdaı oryn alyp, órt saldarynan oqýshylar japa shegetin bolsa, túrmege eń birinshi mektep dırektory túsetini anyq. Sonda ne isteý kerek? Bizdiń oıymyzsha, alǵashqy eskertýden soń mektep ákimshiliginiń jazǵan aryzyna qaramastan, kemshilik túzelmese, aıyppul aýdandyq bilim berý bóliminiń basshysyna salynýy kerek edi. Al odan nátıje shyqpasa aýdan ákimine aıyppul salynsyn, áıtpese qylmystyq is qozǵalsyn. Másele bala ómiri týraly bolyp otyrǵanyn nege esten shyǵaramyz?», - deıdi Májilis depýtaty.
Eskerte keteıik, depýtattar tarapynan júrgizilgen saýalnama elimizdiń barlyq oblystaryndaǵy bilim berý, densaýlyq saqtaý men mádenıet nysandarynyń basshylary arasynda júzege asyryldy. Sonymen qatar depýtattyń sózine qaraǵanda, bilim berý mekemeleri «bizdi bári tekseredi, oblystyq bilim basqarmasynan bastap, aýdandyq bilim bólimi, ákimdik, tótenshe jaǵdaılar, sanepıdqadaǵalaý, prokýratýra, aqyr aıaǵy ardagerler keńesi de tekseredi», deıtin kórinedi.
