Tótenshe jaǵdaılar mınıstrliginiń qyzmetkerleri kezekten tys attestattaýǵa daıyndalýda
ASTANA. 26 sáýir. QazAqparat - «Quqyq qorǵaý organdarynyń qyzmetkerlerin kezekten tys attestattaýdan ótkizý týraly» Qazaqstan Respýblıkasy Prezıdentiniń 2012 jylǵy 8 sáýirdegi Jarlyǵyn oryndaý úshin
Qazaqstan Respýblıkasy Tótenshe jaǵdaılar mınıstrligi atalǵan is-sharalarǵa tıisti daıyndyq júrgizýde. Bul týraly mınıstrliktiń baspasóz qyzmetinen habarlandy.
Atap aıtqanda, Tótenshe jaǵdaılar mınıstriniń Elbasy Jarlyǵyn iske asyrý jónindegi arnaıy buıryǵy shyqty. Ol boıynsha kezekten tys attestattaý ótkizý jóninde Ortalyq jáne repýblıkalyq attestatsııalaý komıssııasynyń qyzmetin qamtamasyz etý jónindegi Jumys tobynyń quramy jáne Erejesi bekitildi. Budan bólek, mınıstrliktiń memlekettik órtke qarsy qyzmet organdary qyzmetkerlerin kezekten tys attestattaýdan ótkizý jónindegi is-sharalar jospary; qyzmettik jáne dene tárbıesi daıyndyǵy normatıvteriniń tizbesi; psıhologııalyq áńgime júrgizý tártibi; Qazaqstan Respýblıkasy zańnamasyn bilýge arnalǵan kompıýterlik testileý júrgizý úshin suraqtar tizbesi bekitilgen.
Baspasóz qyzmeti taratqan málimetke qaraǵanda, Tótenshe jaǵdaılar mınıstrligi memlekettik órtke qarsy qyzmet organdarynyń 16 422 qyzmetkeri kezekten tys attestattaýǵa jatady. Olardyń ishinde:
41-i ortalyq apparattyń qyzmetkerleri;
30-y Órtke qarsy qyzmet komıtetinen;
1663-y oblystar, Astana jáne Almaty qalalarynyń Tótenshe jaǵdaılar departamentterinen;
14549-y oblystar, Astana jáne Almaty qalalarynyń Tótenshe jaǵdaılar departamentteri «Órt sóndirý jáne apattyq-qutqarý jumystary qyzmeti» memlekettik mekemesinen;
20-y «Respýblıkalyq daǵdarys ortalyǵy» memlekettik mekemesinen;
119-y «Kókshetaý tehnıkalyq ınstıtýty» memlekettik mekemesinen bolyp otyr.
Sonymen qatar, Tótenshe jaǵdaılar mınıstrliginiń resmı veb-saıtynda attestattaý sharasyna qatysty arnaıy aıdar ashyldy. Onda ótkiziletin attestattaýdyń normatıvtik-quqyqtyq negizimen tanysýǵa jáne attestattaýǵa jatatyn qyzmetkerge qatysty ótinish qaldyrýǵa bolady, qupııalylyǵyna kepildik beriledi.
Jalpy, quqyq qorǵaý organdaryn kezekten tys attestattaýǵa daıarlaý jáne ótkizý máseleleri mınıstrlik basshylyǵynyń qatań baqylaýyna alynǵan.
