Tótenshe jaǵdaılar mınıstrliginiń kúshteri 9 aı ishinde 8 myńǵa jýyq adamdy qutqardy - V. Bojko
ASTANA. 15 qarasha. QazAqparat /Qanat Mámetqazyuly/ -Tótenshe jaǵdaılar mınıstrliginiń kúshteri osy jyldyń 9 aıy ishinde 7 myń 954 adamdy qutqardy. Bul týraly búgin QR Parlamenti Májilisinde elimizdegi azamattyq qorǵanys júıelerin jetildirý máselelerine arnalǵan Úkimet saǵatynda QR Tótenshe jaǵdaılar mınıstri Vladımır Bojko aıtty.
Onyń aıtýynsha, atalǵan kezeńde tótenshe jaǵdaılar aımaǵynan 10 myń 173 adam kóshirilip, 59 myń 705 ret oqıǵa ornyna shuǵyl jetý áreketteri jasaǵan. «Osy ýaqyt aralyǵynda asa qıyn apattyq-qutqarý jumystary qysqy-kóktemgi kezeńge tuspa-tus kelip, oǵan aýqymdy tabıǵı aýytqýlar tán bolǵanyn atap ótý qajet. Máselen, eldiń shyǵys jáne ońtústik-shyǵys óńirlerindegi asa qıyn jaǵdaıǵa normadan 3 ese artyq, jekelegen tustarda jyldyq normadan 6 esege kóp qarly burqasyn bolýy yqpal etti. Óńirdegi bundaı jaǵdaı sońǵy 50 jylda birinshi ret bolyp otyr. Tasqyn sýdyń kúrt kóterilýi saldarynan, tipti tabıǵı apatqa eshqashan ushyramaǵan eldi mekender de sý astynda qaldy. Osylaısha, jazyq jerlerdegi erigen qardan bolǵan tasqynnyń eni 2-3 shaqyrymǵa deıin jetti», - dedi V. Bojko
«Mınıstrlik halyqty, eldiń aýmaǵyn tótenshe jaǵdaılardyń keri saldarynan tıimdi qorǵaýǵa jáne aldyn alýǵa baǵyttalǵan quqyqtyq, uıymdastyrý jáne is júzindegi sharalar keshenin iske asyrýdy aıtarlyqtaı jandandyrdy. Sonyń arqasynda tótenshe jaǵdaılardan zardap shekkenderdiń jalpy sany 4,8 paıyzǵa, qaýipti óndiriste jaraqattanǵandardy 25,7 paıyzǵa, óndiriste qaza bolǵandardy 28,7 paıyzǵa, órtten bolǵan materıaldyq shyǵyndy 9,9 paıyzǵa azaıtýǵa qol jetkizildi», - dedi V. Bojko.
