Tótenshe jaǵdaılar mınıstrligine qosymsha mindetter júktelmek

ASTANA. QazAqparat – Tótenshe jaǵdaılar mınıstrligine birqatar qosymsha fýnktsııa berilýi múmkin. Bul týraly «Ashyq» NQA portalynda jarııalanǵan Úkimet qaýlysynyń jobasynda jazylǵan, dep habarlaıdy QazAqparat tilshisi.

Qujatta kórsetilgendeı, endi vedomstvoǵa myna fýnktsııalar berilmek:

- trassalyq medıtsınalyq-qutqarý pýnkterin ornalastyrý, qaıta ornalastyrý jáne joıý boıynsha oryndardy aıqyndaý ádistemesin ázirleıdi jáne bekitedi;

- tabıǵı jáne tehnogendik sıpattaǵy tótenshe jaǵdaılar kezinde halyqqa (onyń ishinde azamattyq qorǵaý organdarynyń qyzmetkerlerine) shuǵyl psıhologııalyq kómek kórsetý qaǵıdalaryn ázirleıdi jáne bekitedi;

- densaýlyq saqtaý salasyndaǵy ýákiletti organmen kelisim boıynsha, tabıǵı jáne tehnogendik sıpattaǵy tótenshe jaǵdaılar kezinde, azamattyq qorǵaý salasyndaǵy ýákiletti organnyń Shuǵyl medıtsınalyq jáne psıhologııalyq kómek qyzmeti Apattar medıtsınasy jasaǵynyń jumysy úshin densaýlyq saqtaý salasynyń medıtsına qyzmetkerlerin tartý qaǵıdalaryn ázirleıdi jáne bekitedi;

- shuǵyl medıtsınalyq jáne psıhologııalyq kómek qyzmeti sımvolynyń sıpattamasyn ázirleıdi jáne bekitedi.

«Jobanyń maqsaty – jańa trassalyq medıtsınalyq-qutqarý pýnkterin ornalastyrý úshin oryndardy belgileý, sondaı-aq olardy qaıta ornalastyrý jáne joıý máselelerin reglamentteý, psıhologterdiń qyzmetin reglamentteý jáne jergilikti atqarýshy organdardyń medıtsına qyzmetkerlerin Apattar medıtsınasy otrıadynyń qyzmeti úshin tartý múmkindigi bóliginde normatıvtik olqylyqtardy joıý», - dep túsindirme berilgen qaýly jobasyna.

Qujat 25 sáýirge deıin kópshilik talqylaýda bolady.