Tótenshe jaǵdaılar mınıstrligine birqatar qosymsha quzyret berilýi múmkin
ASTANA. QazAqparat – Tótenshe jaǵdaılar mınıstrligine birshama qosymsha quzyret berilýi múmkin. Bul týraly «Ashyq» NQA portalynda jarııalanǵan Úkimet qaýlysynyń jobasynda jazylǵan, dep habarlaıdy QazAqparat tilshisi.
Qujatqa sáıkes, endi vedomstvoǵa myna fýnktsııalar beriledi:
- adamdardy qutqarý úshin jáne asa qajet bolǵan jaǵdaıda tótenshe jaǵdaılar aımaǵyndaǵy uıymdardyń baılanys, kólik quraldaryn, múlki men ózge de materıaldyq quraldaryn paıdalaný qaǵıdalaryn ázirleıdi jáne bekitedi;
- mindetti túrde memlekettik emes órtke qarsy qyzmet qurylatyn uıymdar men obektilerdiń tizbesin ázirleıdi jáne bekitedi;
- qalalardy azamattyq qorǵanys boıynsha toptarǵa, uıymdardy azamattyq qorǵanys boıynsha sanattarǵa jatqyzý jónindegi ólshemsharttardy ázirleıdi jáne bekitedi;
- memlekettik materıaldyq rezervtiń materıaldyq qundylyqtaryn saqtaýǵa arnalǵan obektilerdi ornalastyrý jáne salý jóninde sheshimder qabyldaıdy;
- tabıǵı jáne tehnogendik sıpattaǵy tótenshe jaǵdaılardyń synyptamasyn belgileıdi;
- óz quzyreti sheginde klımattyq qaterlerden bolatyn dúleı zilzala táýekelderin baǵalaýdy júrgizedi;
- obektilik kásibı avarııalyq-qutqarý qyzmetteri men quralymdaryn qurý, ornyn aýystyrý, qaıta beıindeý nemese taratý týraly uıymdar basshylyǵynyń sheshimderin kelisedi;
- memlekettik materıaldyq rezerv salasyndaǵy memlekettik saıasattyń negizgi baǵyttaryn ázirleıdi jáne iske asyrýdy qamtamasyz etedi.
Úkimet qaýlysynyń jobasy 5 sáýirge deıin kópshilik talqylaýda bolady.
