Tótenshe jaǵdaılar mınıstrligi tabıǵı apattan japa shekkenderge materıaldyq kómek berýden bas tartpaq
ASTANA. 11 sáýir. QazAqparat - Aldaǵy ýaqytta tótenshe jaǵdaılar mınıstrligi tabıǵat apatynan japa shekken nysandarǵa materıaldyq kómek berýden bas tartatyn bolady.
Osyndaı zań jobasy ázirlenip jatyr. Bul týraly Parlament Senatynyń Óńirlik damý jáne tabıǵatty paıdalaný komıtetiniń keńeıtilgen otyrysy barysynda Tótenshe jaǵdaılar mınıstri Vladımır Bojko málim etti.
Júzdesý barysynda bıylǵy sý tasqyny saldarynan zardap shekkenderge memleket tarapynan beriletin kómek máseleleri qozǵalyp, ondaı qamqorlyqtyń barlyq azamattarǵa birdeı jetpeı qalatyn jaıttary da aıtyldy. «Jalpy aldaǵy ýaqytta tabıǵat apaty úshin materıaldyq kómek berýden bas tartý tetigin engizýdi kózdep otyrmyz. Onyń ornyna jurtshylyq ózderiniń qora-jaılaryn, baspanalaryn saqtandyrýy tıis, sondaı tetikti engizýdi qarastyramyz. Osy máseleni qamtıtyn zań jobasy búginde Úkimettiń qaraýynda jatyr. Jaqyn arada ol Parlamentke jiberilmek», - deıdi V. Bojko.
