Tótenshe jaǵdaılar mınıstrligi Azııa oıyndary ótetin nysandarda arnaıy-taktıkalyq oqýlar ótkizedi
ASTANA. Qyrkúıektiń 2-si. QazAqparat /Gúlmıra Álıakparova/ - Tamyzdyń ótken 31-i kúni QR Tótenshe jaǵdaılar mınıstri Vladımır Bojko, 2011 jylǵy 7-shi Qysqy Azııa oıyndaryna Almaty oblysy men Astana jáne Almaty qalalarynan qatystyrylatyn nysandarda qaýipsizdikti qamtamasyz etý úshin arnaıy-taktıkalyq oqýlar ótkizý jóninde keńes ótkizdi.
Keńes barysynda Tótenshe jaǵdaılardy joıý departamentiniń dırektory general-maıor Dıhanbek Satylǵanov, Azıada oıyndaryn ótkizý barysynda qaýipsizdikti qamtamasyz etý boıynsha atqarylyp jatqan sharalar týraly baıandady.
Máselen, tótenshe jaǵdaılar qalyptasqan jaǵdaıda jedel áreket etý maqsatynda, sporttyq nysandar men delegatsııalar ornalastyrylǵan jerlerge TJM-nyń kúshteri men jeke quramnan jasaqtalǵan kezekshilik bekitiletin bolady. Kezekshi toptyń quramyna órt qyzmetteri, Apatty medıtsına ortalyǵynyń dárigerleri, QR Densaýlyq saqtaý mınıstrliginiń jedel medıtsınalyq járdem qyzmetteri men qutqarýshylar kiredi. Sondaı-aq Azıada barysynda «Qazavıaqutqarý» RMK da turaqty kezekshilikte bolady.
Sonymen birge, 7-shi Qysqy Azııa oıyndary kezinde qaýipsizdikti qamtamasyz etý josparyna sáıkes, ústimizdegi qyrkúıek aıynyń 13-18 kúnderi aralyǵynda Almaty oblysy men Astana jáne Almaty qalalarynan oıynǵa qatystyrylatyn nysandarda TJM-nyń qurylymdary men kásibı apatty-qutqarý qyzmetteriniń qatysýymen «Qazqutqarý-2010» taktıkalyq-arnaıy oqýlaryn ótkizý josparlanýda.
Oqýlarǵa TJM-nyń aımaqtar boıynsha departamentteri men qurylymdarynyń jeke quramdaǵy 1132 adamy, 172 tehnıkasy jumyldyrylady.
